Կառավարությունն ու ԱԺ-ն կքննարկեն կենդանիների նկատմամբ դաժան վերաբերմունքը քրեականացնելու հարցը
2 րոպեի ընթերցում
ԵՐԵՎԱՆ, 2 ՄԱՅԻՍԻ, ԱՐՄԵՆՊՐԵՍ: Կառավարությունը քննարկեց «Հայաստանի Հանրապետության քրեական օրենսգրքում լրացում կատարելու մասին» և «Վարչական իրավախախտումների վերաբերյալ օրենսգրքում փոփոխություններ կատարելու մասին նախագծերի փաթեթը, որը ներկայացրել են Ազգային ժողովի «Բարգավաճ Հայաստան» խմբակցության պատգամավորները: Փաթեթով առաջարկվում է քրեականացնել կենդանիների նկատմամբ դաժան վերաբերմունքը:
«Բովանդակային առումով համաձայն լինելով սրա հետ` կարծում ենք, որ պետք է խնդիրը լուծել համապարփակ ձևով», - «Արմենպրես»-ի փոխանցմամբ, ասաց Արդարադատության նախարար Արտակ Զեյնալյանը:
ՎարչապետՆիկոլ Փաշինյաննասաց, որ գաղափարի առումով ընդունելի նախագիծ է:
«Բայց չափանիշները պետք շատ հստակ լինեն, որ այնպիսի իրավիճակի առաջ չկանգնենք, որ, օրինակ, մարդն իր բակում, ասենք, ծննդյան օրվա առիթով գառ է մորթել, քրեական գործ հարուցենք», - ասաց Վարչապետը:
Արտակ Զեյնալյանն արձագանքեց, որ առաջարկում է ձեռնպահ մնալ այս նախագծից, համատեղ քննարկում իրականացնել, ստեղծել օրենքը:
Նիկոլ Փաշինյանը նշեց, որ կենդանիների նկատմամբ դաժան վերաբերմունքի բազմաթիվ օրինակներ կան: Նա հիշեց, որ նման դեպքի ականատես է եղել քրեակատարողական հիմնարկում: «Երբեմն կենդանիներին, օրինակ, հրաձգարանի զվարճանքի համար թիրախ են դարձնում, բազմաթիվ են դեպքերը», - ասաց Նիկոլ Փաշինյանը: