ԵԱՏՄ շուկայի առաջարկը հանգիստ կարող է բավարարել ներքին պահանջարկն առանց ապրանքների գների բարձրացման. Տիմուր Մաքսիմով
2 րոպեի ընթերցում
ԵՐԵՎԱՆ, 26 ԱՊՐԻԼԻ, ԱՐՄԵՆՊՐԵՍ: Հայաստանի համար մի շարք ապրանքատեսակների մասով ԵԱՏՄ մաքսային դրույքաչափերի տարաժամկետման ռեժիմը կփոփոխվի, թե ոչ, դեռ պարզ չէ: «Արմենպրես»-ի հաղորդմամբ, Մոսկվա-Երևան տեսակամուրջի ժամանակ ՌԴ տնտեսական զարգացման փոխնախարար Տիմուր Մաքսիմովը նշեց, որ եթե խոսվում է այդ ռեժիմի փոփոխության կամ երկարաձգման մասին, ապա դա պետք է դիտարկվի՝ ելնելով ներքին շուկայում եղած պահանջարկից ու առաջարկից:
«Չեմ կարող ասել,թե ինչ իրավիճակ է եղել, երբ այդ ռեժիմի մասին որոշումն ընդունվել է, բայց, կարծում եմ, որ այսօր մենք հիմա այնպիսի փուլում ենք, որ ներքին շուկայում առաջարկները կարող են բավարարել պահանջարկը: Հետևաբար` պետք է նայել ներքին շուկայի հնարավորությունները, դիտարկել պահանջարկն, այդ թվում Հայաստանի: Եթե գլխավոր մտավախությունն այն է, որ ռեժիմի փոփոխությամբ պայմանավորված որոշ ապրանքների գները կարող են բարձրանալ, ապա կարող եմ ասել, որ միության ներքին շուկայի առաջարկը հանգիստ կարող է բավարարել պահանջարկն առանց գների բարձրացման»,-ասաց Տիմուր Մաքսիմովը:
Հայաստանն իր անդամակցության առաջին տարիներին մի շարք ապրանքների գծով ստացել է ԵԱՏՄ մաքսային դրույքաչափերի ներդրման տարաժամկետում: Նախատեսված է, որ ԵԱՏՄ դրույքաչափերն ուժի մեջ կմտնեն 2020 թվականի հունվարից: