368.59
Մանե Թանդիլյանն առաջարկում է գրավատների և փոխանակման կետերի տուրքի բարձրացման հարցը քննարկել ԿԲ-ի կողմի առանձին ներկայացվող առաջարկով
2 րոպեի ընթերցում
ԵՐԵՎԱՆ, 10 ԱՊՐԻԼԻ, ԱՐՄԵՆՊՐԵՍ: ՀՀ ազգային ժողովի «Լուսավոր Հայաստան» խմբակցության պատգամավոր Մանե Թանդիլյանն առաջարկում է հարկային բարեփոխումների փաթեթից հանել գրավատների, փոխանակման կետերի բարձրացմանը վերաբերող փոփոխությունները և այդ հարցը խորհրդարանում քննարկել որպես Կենտրոնական բանկի կողմից առանձին ներկայացվող առաջարկ:
«Արմենպրես»-ի հաղորդմամբ՝ Թանդիլյանն այս մասին գրառում է կատարել իր «Ֆեյսբուք»-ի էջում:
«Գրավատների և փոխանակման կետերի պետական տուրքի բարձրացումը որևէ առնչություն չունի հարկային բարեփոխումների հետ: Այդ ոլորտի պատասխանատուն հանդիսանում է Կենտրոնական բանկը և անտրամաբանական է ֆինանսական վերահսկողության շրջանակում ներկայացվող առաջարկը ներկայացնել կառավարության հարկային բարեփոխումների շրջանակում»,-գրել է Թանդիլյանը:
Նրա կարծիքով՝ ոլորտի վերաբերյալ կենտրոնական բանկի մտահոգությունները, լուծման ուղիները միանշանակ անհրաժեշտ է քննարկել և իրականացնել բարեփոխումներ այդ ոլորտներում: «Հետևաբար, առաջարկում եմ կառավարությանը հարկային բարեփոխումների փաթեթից հանել «Պետական տուրքի մասին» ՀՀ օրենքում ֆինանսական հաստատություններին վերաբերյալ փոփոխությունների մասը և այդ հարցը խորհրդարանում քննարկել որպես կենտրոնական բանկի կողմից առանձին ներկայացվող առաջարկ՝ ոլորտում առկա խնդիրների լուծման համատեքստում»,-եզրափակել է պատգամավորը:
Բաժանորդագրվեք մեր ալիքին Telegram-ում