Թմրանյութերի ազատ վաճառքի, շրջանառության ու օգտագործման մասին որևէ նախաձեռնություն չկա. Արսեն Թորոսյան
1 րոպեի ընթերցում
ԵՐԵՎԱՆ, 25 ՓԵՏՐՎԱՐԻ, ԱՐՄԵՆՊՐԵՍ: ՀՀ առողջապահության նախարար Արսեն Թորոսյանը հերքել է այն լուրերը, թե կառավարությունը պատրաստվում է օրինականացնել թմրանյութերի ազատ վաճառքը, շրջանառությունն ու օգտագործումը:
«Արմենպրես»-ի փոխանցմամբ` այս մասին փետրվարի 25-ին Թորոսյանը գրել է «Ֆեյսբուք»-ի իր պաշտոնական էջում:
«Թմրանյութերի ազատ վաճառքի, շրջանառության ու օգտագործման մասին որևէ նախաձեռնություն չկա և չի կարող լինել... Ես ինքս կարգելակեմ ցանկացած նման նախաձեռնություն, քանի դեռ կառավարության անդամ եմ, եթե որևէ մեկի մտքով նման բան անցնի։ Վստահ եմ, նույնը կանի մեր ամբողջ կառավարությունը»,- գրել է Թորոսյանը:
Առողջապահության նախարարն անդրադարձել է նաև հանրային վայրերում ծխախոտի օգտագործման սահմանափակումներին:
«Ոչ ոք չի արգելում ծխելը՝ չնայած նրան, որ այն տարեկան սպանում է մեր հազարավոր քաղաքացիների, այլ սահմանափակվելու են փակ հանրային վայրերում ծխախոտային արտադրատեսակների օգտագործումը, որպեսզի կանխարգելվի այդ «սպանդը»,- նշված է հրապարակման մեջ: