2 րոպեի ընթերցում
ԵՐԵՎԱՆ, 20 ՓԵՏՐՎԱՐԻ, ԱՐՄԵՆՊՐԵՍ: ՀՀ ազգային ժողովի «Իմ քայլը» խմբակցությունը ոստիկանապետ Վալերի Օսիպյանի հետ աշխատանքային քննարկում է նախատեսում մյուս շաբաթվա ընթացքում: «Արմենպրես»-ի հաղորդմամբ՝ խմբակցության ղեկավար Լիլիթ Մակունցն այս մասին հայտնեց փետրվարի 20-ին ԱԺ-ում լրագրողների հետ ճեպազրույցում:
«Մյուս շաբաթ նախատեսում ենք հրավիրել ոստիկանապետին: Դա կա մեր օրակարգում, պարզապես մեր խմբակցությունից գործուղումներ ունենք և ուզում ենք, որ հնարավորինս շատ պատգամավորներ ներկա լինեն»,-ասաց Մակունցը:
Խմբակցությունը հանդիպումներ է նախատեսում նաև մյուս գերատեսչությունների ղեկավարների հետ: Փետրվարի 21-ին նախատեսել են հանդիպում ՀՀ կրթության և գիտության նախարար Արայիկ Հարությունյանի հետ: Սակայն, ինչպես հայտնեց Մակունցը, դահլիճի զբաղված լինելու պատճառով հնարավոր է՝ հետաձգեն: Փետրվարի 22-ին նախատեսված է հանդիպում ՀՀ տրանսպորտի, կապի և տեղեկատվական տեխնոլոգիաների նախարար Հակոբ Արշակյանի հետ: Մակունցի խոսքով՝ Արշակյանն ինքն է խմբակցության հետ հանդիպման առաջարկն արել:
Խմբակցության ղեկավարի խոսքով՝ գերատեսչությունների ղեկավարների հետ քննարկում են ոլորտների խնդիրները, օրենսդրական նախաձեռնություններն ու խնդիրների լուծման համար օրենսդիրի անելիքները:
Ավելի վաղ «Իմ քայլը» խմբակցությունն ԱԺ-ում աշխատանքային հանդիպում էր ունեցել Պետական եկամուտների կոմիտեի նախագահ Դավիթ Անանյանի և Ֆինանսների նախարար Ատոմ Ջանջուղազյանի հետ: Փետրվարի 20-ին խմբակցությունը քննարկում անցկացրեց ՀՀ առողջապահության նախարար Արսեն Թորոսյանի հետ: