Նիկոլ Փաշինյանն անդրադարձավ էներգետիկ անվտանգության ապահովման տեսլականին
2 րոպեի ընթերցում
ԵՐԵՎԱՆ, 12 ՓԵՏՐՎԱՐԻ, ԱՐՄԵՆՊՐԵՍ: ՀՀ վարչապետ Նիկոլ Փաշինյանը Ազգային ժողովում կառավարության ծրագիրը ներկայացնելիս պատգամավորների հետ հարցուպատասխանի ընթացքում անդրադարձավ ՀՀ-ում էներգետիկ անվտանգության ապահովման տեսլականին:
«Արմենպրես»-ի փոխանցմամբ՝ փետրվարի 12-ին վարչապետը նշեց, որ այս հարցում շատ կարևոր է Հայաստանի էներգախնայող լինելը:
«Կարևոր ենք համարում էներգետիկ անվտանգության տեսակետից միջուկային էներգիա գոյությունը, և կարծում եմ, որ ՀՀ-ն պետք է շարունակաբար ջանքեր գործադրի միջուկային էներգիա ունենալու համար: Իհարկե, նաև այլընտրանքային և վերականգնվող էներգետիկան պետք է զարգանա, և Հայաստանը միջազգային բոլոր չափանիշներով շատ մեծ պոտենցիալ ունի արևային էներգիայի զարգացման համար: Մենք այս հարցով համագործակցում ենք մի շարք միջազգային ընկերությունների հետ: Էներգետիկ անվտանգությունը միայն էներգառեսուրսների խնդիր չի, շատ կարևոր է, որ մեր տնտեսությունը լինի էներգախնայող»,- ասաց Փաշինյանը:
ՀՀ վարչապետը նշեց, որ կառավարությունն այս հարցը դիտարկում է նաև Հայաստանի ԵԱՏՄ անդամակցության համատեքստում:
«Շատ կարևոր է արձանագրել, որ ԵԱՏՄ-ն ընդհանուր տնտեսական տարածք է, և այդտեղ էներգակիրների գներն առնվազն շատ մոտ պետք է լինեն իրար, այլապես ընդհանուր տնտեսական տարածքի տրամաբանությունը չի աշխատի: Մենք համոզված ենք, որ այս հարցում կկարողանանք լիարժեք ըմբռնման հասնել, իհարկե կան երկրներ, որոնք էներգակիրներն ունեն ԵԱՏՄ տարածքում, կան երկրներ, որ չունեն, և մենք պետք է բալանսավորված լուծումների կարողանանք հասնել»,- նշեց վարչապետը: