3 րոպեի ընթերցում
ԵՐԵՎԱՆ, 17 ՀՈՒՆՎԱՐԻ, ԱՐՄԵՆՊՐԵՍ: ԱԺ «Լուսավոր Հայաստան» խմբակցության ղեկավար Էդմոն Մարուքյանը Հայաստանում մարդու իրավունքների պաշտպանության հետ կապված որոշակի խնդիրներ է տեսնում:
«Արմենպրես»-ի հաղորդմամբ` պատգամավորը խորհրդարանի հերթական նիստում Մարդու իրավունքների պաշտպանության և հանրային հարցերի մշտական հանձնաժողովի նախագահի ընտրության հարցի քննարկմանը ուշադրություն հրավիրեց մի շարք խնդիրների վրա և հույս հայտնեց որոշակի լուծումներ գտնել հանձնաժողովի աշխատանքների շրջանակում:
«Բոլորը, այդ թվում՝ ես, ուրախ ենք, որ Հայաստանում հեղափոխություն է եղել, սակայն դեռ մարդու իրավունքների խնդիրներ կան: Մարդու իրավունքների վիճակն այնքան էլ լավ չէ: Այս «ուրախ» ընթացքը պետք է շարունակվի` հաշվի առնելով ՀՀ միջազգային պարտավորությունները, մեր օրենսդրությունը: Որևէ բան չի կարող արդարացնել մարդու իրավունքների ոտնահարումը: Օրինակ՝ փաստաբանն ուզում է իր պաշտպանյալի գործին մասնակցել դատարանում, դատարանի դիմաց բողոքի ցույց Է, փաստաբանի մասնագիտական գործունեությունը խոչընդոտվում է»,-ասաց Մարուքյանը:
Նա նաև անդրադարձավ ամիսներ առաջ բարձրաստիճան պաշտոնյաների հեռախոսազրույցի գաղտնալսման ու հրապարակման դեպքին: «Գաղտնալսման մասով գործ կա հարուցված, սակայն հարցնող չկա, թե ինչ եղավ»,-նշեց Մարուքյանը:
Նա նաև կարևորեց, որ գործադիր իշխանությունը հստակ ձևակերպումներ տա, որ Հայաստանում փաստաբանները պաշտպանված են և պիտի պաշտպանվեն պետության կողմից: Եվ այդ պաշտպանությունը պիտի լինի կոնկրետ գործողություններով:
Մարուքյանը նշեց, որ ԱԺ մարդու իրավունքների պաշտպանության և հանրային հարցերի մշտական հանձնաժողովը պետք է օր առաջ զբաղվի այդ խնդիրներով:
Հանձնաժողովի նախագահի պաշտոնում «Բարգավաճ Հայաստան» խմբակցությունը ներկայացրել է Նաիրա Զոհրաբյանի թեկնածությունը: Ազգային ժողովը հունվարի 17-ի նիստում քննարկում է արդեն ստեղծված տասնմեկ մշտական հանձնաժողովների նախագահների ընտրության հարցը:
Սեպտեմբերի 11-ին էլեկտրոնային լրատվության միջոցներումտարածվել էրՀՀ ազգային անվտանգության ծառայության տնօրեն Արթուր Վանեցյանի և ՀՀ հատուկ քննչական ծառայության պետ Սասուն Խաչատրյանի միջև տեղի ունեցած հեռախոսազրույցի ձայնագրությունը: Ավելի ուշ գաղտնալսել էին նաև Նիկոլ Փաշինյանին ու Արթուր Վանեցյանին: