Արմեն Աշոտյանը նախորդ իշխանության տապալման պատճառներից է համարում իրենք իրենց կեղծելը
1 րոպեի ընթերցում
ԵՐԵՎԱՆ, 22 ՀՈԿՏԵՄԲԵՐԻ, ԱՐՄԵՆՊՐԵՍ: Հանրապետական կուսակցության իշխանության տապալման պատճառներից մեկն այն էր, որ երբեմն իրենք իրենց կեղծում էին, ասում բաներ, որոնց հետ հոգու խորքում համաձայն չէին: «Արմենպրես»-ի հաղորդմամբ` ԱԺ-ում լրագրողերի հետ ճեպազրույցում նման տեսակետ հայտնեց ՀՀԿ խմբակցության պատգամավոր Արմեն Աշոտյանը:
Ավելի վաղ Աշոտյանը նշել էր, որ Ընտրական օրենսգիրքը 24-ժամյա ռեժիմում ընդունելը սխալ է համարում. ի պատասխան լրագրողները դիտարկում արեցին՝ հիշեցնելով, որ նախորդ իշխանության ժամանակ նախագծեր էին բերվում ԱԺ և հապճեպ ընդունվում:
«Իմ որոշ գործընկերներ բաներ են ասում, ովքեր, վստահ եմ, այդպես չեն մտածում: Գուցե մեզ են նմանակում, բայց շատ արագ սովորեցին մեր սխալները: Մի կեղծեք ձեզ: Իշխանության տապալման մեր սխալներից մեկն էլ դա էր, որ մենք մեզ երբեմն կեղծում էինք, ասում էինք բաներ, որոնց հետ հոգու խորքում համաձայն չէինք»,-ասաց Աշոտյանը:
Նա իշխանության ներկայացուցիչներին հորդորեց չկրկնել այն սխալները, որոնց պատճառով Հանրապետական կուսակցությունը քաղաքական ճգնաժամի մեջ է: