Դատարանը մերժեց ՊՊԾ գնդի գրավման գործով ամբաստանյալ Պավլիկ Մանուկյանին ազատ արձակելու միջնորդությունը
1 րոպեի ընթերցում
ԵՐԵՎԱՆ, 8 ՕԳՈՍՏՈՍԻ, ԱՐՄԵՆՊՐԵՍ: Երևանի ընդհանուր իրավասության դատարանի Շենգավիթ նստավայրում կայացած նիստում դատարանը մերժեց ՊՊԾ գնդի գրավման գործով ամբաստանյալ Պավել Մանուկյանին երաշխավորությամբ ազատ արձակելու միջնորդությունը:
Նիստի ընթացքում Պավլիկ Մանուկյանի պաշտպանը դատարանին ներկայացրեց իր պաշտպանյալի խափանման միջոց կալանավորումը փոխելու միջնորդություն: Ինչպես տեղեկացնում է«Արմենպրես»-ը, պաշտպանը ներկայացրել է նաև Ազգային ժողովի «Ծառուկյան» խմբակցության պատգամավորներ Վահե Էնֆիաջյանի և Շաքե Իսայանի անձնական երաշխավորությունները: Նրանցից յուրաքանչյուրը, որպես երաշխիք, 500 հազարական դրամ էր մուծել դատարան և անձամբ ներկայացել դատական նիստին:
Դատարանը խորհրդակցական սենյակից վերադառնալուց հետո որոշում կայացրեց մերժել միջնորդությունը` պատճառաբանելով, որ ընթացող դատական քննության ընթացքում ամբաստանյալի դրսևորած վարքագիծը, այն է՝ ընդգծված բացասական վերաբերմունքը դատարանի և դատավարության մյուս մասնակիցների նկատմամբ, դատարանին բերում են այն եզրահանգման, որ, հայտնվելով ազատության մեջ, Պավել Մանուկյանը չի դրսևորի պատշաճ վարքագիծ, որով իսկ կխոչընդոտի գործի հետագա քննությանը: