Շահագրգիռ ենք, որ քաղաքական իրավիճակը հանգուցալուծում ստանա Սահմանադրության շրջանակներում. Փաշինյան

ԵՐԵՎԱՆ, 3 ՄԱՅԻՍԻ, ԱՐՄԵՆՊՐԵՍ: Ազգային ժողովի «Ելք» խմբակցության ղեկավար, 35 պատգամավորի ստորագրությամբ ՀՀ վարչապետի թեկնածու առաջադրված Նիկոլ Փաշինյանն անդրադարձել է մայիսի 8-ին վարչապետի ընտրությանը սատարելու ՀՀԿ-ի որոշմանը: Խորհրդարանում լրագրողների հետ զրույցում, անդրադառնալով հարցին, թե ի՞նչն էր պատճառը, որ ՀՀԿ-ն մայիսի 1-ին դեմ քվեարկեց վարչապետի պաշտոնում իր թեկնածությանը, իսկ հաջորդ օրը հայտարարեց, որ մայիսի 8-ին կսատարի պատգամավորների 1/3-ի առաջադրած թեկնածուին, Նիկոլ Փաշինյանը պատասխանեց. «Կարծում եմ՝ բոլորս ենք շահագրգռված, որպեսզի այս քաղաքական իրավիճակը որքան հնարավոր է շուտ հանգուցալուծում ստանա Սահմանադրության և օրենքների շրջանակներում, և ես ուրախ եմ, որ այդ ըմբռնումը, որն առկա է բոլոր քաղաքական ուժերի մոտ, կոնկրետ արտահայտում պիտի ստանա»,- ասաց Փաշինյանը:

Նա նշեց, որ մինչև վարչապետի ընտրության հարցի քննարկումը հանդիպում կունենա ՀՀԿ խմբակցության հետ՝ շեշտելով, որ միշտ էլ ասել են, որ պատրաստ են երկխոսության և քննարկումների:

Փաշինյանը ևս մեկ անգամ հստակեցրեց՝ իր նախաձեռնած քաղաքական գործընթացում աշխարհաքաղաքական որևէ ենթատեքստ կամ կոնտեքստ ու դավադրություն չկա, իսկ Հայաստանի արտաքին քաղաքականությունը կլինի շարունակական:

Հարցին, եթե ՀՀԿ-ն կողմ քվեարկի՞ վարչապետի պաշտոնում իր թեկնածությանը, իսկ հետո կառավարության ծրագրին, ինչպե՞ս է պատկերացնում արտահերթ ընտրությունների անցկացումը, Փաշինյանն ընդգծեց, որ դրա համար կան սահմանադրական մեխանիզմներ, և իրենք անպայման կկիրառեն այդ մեխանիզմները: «Կարծում եմ, որ բոլորս էլ հասկանում ենք, որ այս իրավիճակը վերջնականապես լուծված չէ, քանի դեռ արտահերթ ընտրություններ չեն անցկացվել»,- ասաց Նիկոլ Փաշինյանը:

Նա հույս հայտնեց, որ մայիսի 8-ին չի կրկնվի այն, ինչ եղավ մայիսի մեկին վարչապետի ընտրության քվեարկությանը, սակայն հավելեց, որ իրենք պատրաստ են իրադարձություների զարգացման ցանկացած սցենարի: Մայիսի 8-ին վարչապետի ընտրությունից հետո էլ տեղի էլ կունենա մեծ հանրահավաք, որի տեղի ու ժամի մասին լրացուցիչ կտեղեկացնեն:

Անդրադառնալով հարցին՝ մտածո՞ւմ է Սահմանադրություն փոխելու մասին, Փաշինյանն ասաց, որ չի կարծում, թե այդ մասին պետք է մտածեն, քանի որ խոսում են ժամանակավոր կառավարության մասին: «Դա թեմա է, որ նախընտրական շրջանում կքննարկվի, սակայն ես չեմ կարծում, որ Սահմանադրությունն անընդհատ փոխելը լավ պրակտիկա է: Այսինքն, մենք պետք է հասկանանք, թե Սահմանադրությունը մեզ ինչով է խանգարում, և եթե խանգարում է, արձանագրենք դա: Կարծում եմ, որ նման հարցերը ոչ թե վարչապետի և ինչ-որ քաղաքական ուժի մակարդակով լուծվի, այլ դրա շուրջ պետք է լինի հանրության և քաղաքական ուժերի լայն ըմբռնում»,- ասաց նա:

Խորհրդարանում վարչապետի ընտրության երկրորդ փուլը տեղի կունենա մայիսի 8-ին, ժամը 12:00-ին Ազգային ժողովի հատուկ նիստում: ՀՀԿ-ն արդեն հայտարարել է, որ այս անգամ ևս թեկնածու չի առաջադրելու և սատարելու է պատգամավորների 1/3-ի կողմից առաջադրված թեկնածուին: «Ելք» խմբակցության պատգամավոր Արարատ Միրզոյանը հայտնել է, որ վարչապետի պաշտոնում Նիկոլ Փաշինյանի թեկնածությունն առաջադրելու համար անհրաժեշտ ստորագրություններն արդեն հավաքվել են: Վարչապետի թեկնածու առաջադրելու համար անհրաժեշտ է 35 պատգամավորի ստորագրություն:

«Ելք» խմբակցության փորձագետ Վահագն Հովակիմյանը հայտարարել է, որՀայաստանի Հանրապետության վարչապետի պաշտոնում Նիկոլ Վովայի Փաշինյանի առաջադրման փաստաթղթերն արդեն ներկայացվել են ՀՀ ԱԺ ընդհանուր բաժին։