Դավիթ Հարությունյանը Freedom House-ի զեկույցում հայտնաբերել է իրար հակասող դրույթներ
1 րոպեի ընթերցում
ԵՐԵՎԱՆ, 12 ԱՊՐԻԼԻ, ԱՐՄԵՆՊՐԵՍ: ՀՀ արդարադատության նախարարի պաշտոնակատար Դավիթ Հարությունյանն անդրադարձավ Freedom House կազմակերպության զեկույցին, ըստ որի՝ Հայաստանը կանգնած է ավոտրիտար դառնալու վտանգի առաջ և նշեց, որ առաջին անգամ է լսում Freedom House-ի զեկույց, որն արմատապես տարբերվում է այն ընդունված մեթոդաբանությունից, որը կառույցը, որպես կանոն, որդեգրել է:
«Եթե որևէ մեկն ուշադիր ուսումնասիրի այդ զեկույցը, ապա կարծում եմ՝ զարմանքով կհայտնաբերի իրար հակասող դրույթներ: Օրինակ, եթե Սերժ Սարգսյանն առաջադրվում է որպես վարչապետ, դա կտանի դեպի ավտորիտար ռեժիմի, իսկ եթե Սերժ Սարգսյանը չառաջադրվի վարչապետ, ապա դա կդառնա գործադիր իշխանության լռելյայն կառավարում, այսինքն՝ ձախ մի՛ գնա, աջ մի՛ գնա»,-«Արմենպրես»-ի փոխանցմամբ, ասաց Դավիթ Հարությունյանը:
Միաժամանակ, նա զեկույցի հետ կապված բերեց ևս մեկ օրինակ, որը խոսում է հակասականության մասին:
«Զեկույցում խոսվում է «Սասնա ծռերի» մասին, սակայն դրանում գոնե մի տեղ ինձ չհաջողվեց գտնել մեկ հիշատակում, որ նրանք իրականացրել են զինված հարձակում: Սա Freedom House-ի առաջին զեկույցն է, որն արմատապես շեղվել է դասական մեթոդաբանությունից»,- նկատեց Հարությունյանը: