Մենք պետք է կերտենք նոր՝ երիտասարդ Հայաստան. Նախագահ Արմեն Սարգսյան

ԵՐԵՎԱՆ, 9 ԱՊՐԻԼԻ, ԱՐՄԵՆՊՐԵՍ: ՀՀ նորընտիր նախագահ Արմեն Սարգսյանը վստահեցնում է Հայաստանի, Արցախի և Սփյուռքի երիտասարդներին, որ ոչ միայն որպես երկրի նախագահ, այլև գիտության և տեխնոլոգիաների բնագավառներում որոշակի փորձառություն ունեցող մարդ միշտ լինելու է նրանց կողքին: «Արմենպրես»-ի փոխանցմամբ՝ այս մասին նա հայտարարեց մարզահամերգային համալիրում ՀՀ Ազգային ժողովի հատուկ նիստում իր ելույթում:

«Մենք ապրում ենք հարափոփոխ աշխարհում՝ լի բազմաբնույթ վտանգներով, սպառնալիքներով և մարտահրավերներով: Սակայն մեզ համար այն լեցուն է նաև նոր և գրավիչ հնարավորություններով: Եվ մեզնից է կախված՝ կարողանալու ենք, արդյոք, օգտվել այդ պատմական հնարավորություններից: Մեզնից է կախված, թե 21-րդ դարում ինչպիսի Հայաստան ենք ուզում կերտել: Հայաստան, որն ընդունակ կլինի դիմագրավել դարի մարտահրավերներին և արժանի տեղ գրավել առաջավոր ազգերի շարքում: Սա, հիրավի, պատմական հնարավորություն է»,- ասաց Արմեն Սարգսյանը:

Նա 21-րդ դարը մտքի, գիտական թռիչքի դար անվանեց: «Դրան համեմատ մենք պետք է կերտենք նոր՝ երիտասարդ Հայաստան: Դինամիկ, ճկուն և ստեղծագործ Հայաստան: Երկիր, որը կմարմնավորի մեր ժողովրդի իմաստությունն ու տաղանդը, կհամապատասխանի բոլորիս իղձերին և կդառնա բոլորիս հպարտության և ոգևորության աղբյուրը: Հայրենիք՝ աշխարհի բոլոր հայերի համար: Փա՜ռք Հայաստանի Հանրապետությանը: Փա՜ռք Արցախին: Փա՜ռք հայ ժողովրդին: Աստված պահապա՛ն բոլորիս»,- այս խոսքերով Արմեն Սարգսյանը եզրափակեց իր ելույթն ԱԺ հատուկ նիստի ժամանակ:

Նորընտիր նախագահ Արմեն Սարգսյանը երդվեց` ձեռքը դնելով Վեհամոր Ավետարանի և ՀՀ Սահմանադրության վրա: Երևանի Կարեն Դեմիրճյանի անվան մարզահամերգային համալիրում ապրիլի 9-ինգումարված Ազգային ժողովի հատուկ նիստում հնչեց Արմեն Սարգսյանի երդումը. «Ստանձնելով Հանրապետության նախագահի պաշտոնը՝ երդվում եմ. հավատարիմ լինել Հայաստանի Հանրապետության Սահմանադրությանը, իմ լիազորություններն իրականացնելիս լինել անաչառ, առաջնորդվել միայն համապետական ու համազգային շահերով և իմ ողջ ուժը ներդնել ազգային միասնության ամրապնդման գործում: Աստված ինձ օգնական»:

Երդմնակալությունից հետո հնչեց Հայաստանի Հանրապետության օրհներգը, Ամենայն Հայոց Գարեգին Բ կաթողիկոսը հայրապետական օրհնանքի խոսք հղեց:

Հայաստանի Հանրապետությունն ապրիլի 9-ից անցում է կատարում լիարժեք խորհրդարանական կառավարման համակարգի: Լրանում է Նախագահ Սերժ Սարգսյանի լիազորությունների ժամկետը: Սահմանադրության համաձայն՝ սպասվում է ՀՀ կառավարության հրաժարականը:Կառավարության անդամները շարունակում են իրենց պարտականությունների կատարումը մինչև նոր Կառավարության կազմավորումը: