Հայաստանում գիրք նվիրելը դարձել է սիրելի ավանդույթ. նշվում է Գիրք նվիրելու օրը

ԵՐԵՎԱՆ, 19 ՓԵՏՐՎԱՐԻ, ԱՐՄԵՆՊՐԵՍ: Գրականությունը, գիրքը մեր մտերիմն է, սրտակից ընկերը, հարազատն ու բարեկամը: Այն նորանոր հորիզոններ է բացում մեր առաջ, հնարավորություն տալիս ճանաչել աշխարհը, մարդկային բարդ ու խճճված հարաբերությունները, սովորեցնում է սիրել, երազել, պայքարել: Գրքի նկատմամբ հետաքրքրությունն ու սերը մեծացնելու համար հայ մեծ բանաստեղծ Հովհաննես Թումանյանի ծննդյան օրը՝ փետրվարի 19-ը, Հայաստանում նշվում է որպես Գիրք նվիրելու օր։

Տոնը Հայաստանում արմատավորվել է Գրողների միության երջանկահիշատակ նախագահ Լևոն Անանյանի նախաձեռնությամբ2008 թվականից:

«Արմենպրես»-ի թղթակցի հետ զրույցում ՀՀ մշակույթի նախարար Արմեն Ամիրյանն ասաց, որ դեռ հստակ չի որոշել, թե ինչ գրքեր պետք է նվիրի, սակայն այդ օրը, պատրաստվում է գնալ Խնկո Ապոր անվան ազգային մանկական գրադարան, մասնակցել ավանդական դարձած Մանկապատանեկան գրքի երևանյան 14-րդ տոնավաճառին: «Մանկական կամ պատանեկան որևէ ստեղծագործություն կընտրեմ և այդ օրը երեխաների համար հեքիաթ կկարդամ»,-նշեց Ամիրյանը:

Նրա խոսքով՝ այդ տոնը շատ կարևոր է մեր հասարակության ուշադրությունը ևս մեկ անգամ դեպի գիրքը, գրահրատարակչությունը և առհասարակ գրողները գրավելու համար: «Կարծում եմ՝ այդ նպատակով մի քիչ ավելին է պետք անել, քան Գրքի տոնն է և միմյանց գիրք նվիրելը: Կարելի է մտածել ավելի լայնածավալ միջոցառումներ իրականացնելու մասին»,-եզրափակեց նախարարը:

Մի առիթով Հայաստանի գրողների միության նախագահ, բանաստեղծ Էդվարդ Միլիտոնյանն ընդգծել է, որ պատահական չէ գիրք նվիրելու օրը հենց Թումանյանի ծննդյան օրվա հետ կապելը: «Անդրկովկասում չկար գրողների միություն, սակայն Թումանյանը ստեղծել էր «Վերնատունը», որն ինքնին գրողների միություն էր»,-նշել է նա:

Գիրք նվիրելը Հայաստանում արդեն սիրելի ավանդույթ է դառնում:

ՀՀ մշակույթի նախարարությունը և Հայաստանի գրողների միությունը, ՀՀ կառավարության որոշման համաձայն, յուրաքանչյուր տարի Գիրք նվիրելու օրը պետական պատվերով և աջակցությամբ հրատարակված և չվաճառված գրքերը բաշխում են մարզային և համայնքային, ինչպես նաև Արցախի և Ջավախքի գրադարանների միջև: