Իգնատի Առաքելյանը վստահեցնում է, որ գյուղնախարարությունը չի համագործակցում «Մոնսանտո»-ի հետ
1 րոպեի ընթերցում
ԵՐԵՎԱՆ, 9 ՆՈՅԵՄԲԵՐԻ, ԱՐՄԵՆՊՐԵՍ: ՀՀ գյուղատնտեսության նախարարությունն ուսումնասիրում է, թե առ այսօր ինչ գործունեություն է ծավալել ամերիկյան «Մոնսանտո» ընկերությունը մեր երկրում: Կառավարության նիստից հետո լրագրողների հետ զրույցում այդ մասին ասաց ՀՀ գյուղատնտեսության նախարար Իգնատի Առաքելյանը: «Բնապահպանության նախարարության հետ ուսումնասիրում ենք դաշտը, որ հասկանանք, թե ինչ ռիսկեր կան կատարված աշխատանքներից: Կուսումնասիրենք՝ ինչ են անում, որքանով է ԳՄՕ սերմերը տարածված, ինչ են ներմուծում, նոր կնշենք, թե ինչ քայլեր ենք ձեռնարկելու», - «Արմենպրես»-ի փոխանցմամբ, ասաց նախարարը՝ ավելացնելով նաև, որ իր գլխավորած գերատեսչությունը չի համագործակցում նշված ընկերության հետ:
Անդրադառնալով ԳՄՕ սերմերի մուտքը Հայաստան արգելելու մասին օրենսդրական նախաձեռնությանը՝ Իգնատի Առաքելյանն ասաց, որ 2013 թվականին Բնապահպանության նախարարության կողմից եղել է նման նախաձեռնություն, հետո կասեցվել է այն: Այժմ, ըստ Առաքելյանի, վեր է հանվելու այդ օրենսդրական նախաձեռնությունը՝ քննարկելու դրա արդիականության հարցը: