Ալեքսիս Օհանյանը խոստացել է, որ դուստրը կայցելի Հայաստան. Reddit-ի համահիմնադիրը շնորհավորել է ՀՀ Անկախության տոնը
1 րոպեի ընթերցում
ԵՐԵՎԱՆ, 22 ՍԵՊՏԵՄԲԵՐԻ, ԱՐՄԵՆՊՐԵՍ: Հայտնի Reddit սոցիալական ցանցի համահիմնադիր Ալեքսիս Օհանյանը խոստացել է, որ իր աղջիկը՝ Ալեքսիս Օլիմպիա Օհանյան կրտսերը մի օր կայցելի Հայաստան: Ինչպես հաղորդում է «Արմենպրես»-ը, ավագ Օհանյանը Հայաստանի Անկախության տոնի կապակցությամբ գրառում է կատարել ֆեյսբուքյան իր էջում:
«Շնորհավոր Հայաստանի Անկախության տոնը: 1991 թվականին ազատվելով խորհրդային ռեժիմից՝ մեր փոքր երկիրը շարունակում է պայքարել: Կրտսերը (խոսքը նորածին աղջկա՝ Ալեքսիս Օլիմպիա Օհանյանի մասին է- խմբ.) մի օր կայցելի այս երկիր»,- գրել է նա:
Օհանյանը հրապարակել է տարիներ առաջ Միավորված ազգերի կազմակերպության Գլխավոր ասամբլեայում Հայաստանի պատվիրակության համար հատկացված հատվածում արված իր լուսանկարը:
Ալեքսիս Օհանյանի և հայտնի թենիսիստ Սերենա Ուիլյամսի աղջիկը լույս աշխարհ է եկել 2017 թվականի սեպտեմբերի 1-ին: