388.33
Կանադան ակնկալում է հետագայում էլ խորացնել համագործակցությունը Հայաստանի հետ. Ջասթին Թրյուդո
2 րոպեի ընթերցում
ԵՐԵՎԱՆ, 22 ՍԵՊՏԵՄԲԵՐԻ, ԱՐՄԵՆՊՐԵՍ: Կանադայի վարչապետ Ջասթին Թրյուդոն շնորհավորել է Հայաստանին ու հայ ժողովրդին Անկախության 26-րդ տարեդարձի կապակցությամբ:
Ինչպես հաղորդում է «Արմենպրես»-ը, շնորհավորական ուղերձում ասվում է. «Մենք միանում ենք Հայաստանի ժողովրդին ու Կանադայում և ողջ աշխարհում հայ համայնքին՝ տոնելու Հայաստանի անկախության տարեդարձը: Կանադան և Հայաստանի Հանրապետությունն ունեն դինամիկ ու ընկերական հարաբերություններ՝ կառուցված արդարության, ժողովրդավարության, ազատության համատեղ արժեքների, այդ թվում և տարբեր միջազգային կազմակերպություններում, «Ֆրանկոֆոնիա»-ի շրջանակում համագործակցության վրա:
Կանադան ակնկալում է շարունակել աշխատանքը Հայաստանի Հանրապետության հետ՝ հետագայում էլ ամրապնդելու հարաբերությունները երկու երկրի միջև ու խորացնելու համագործակցությունը գլոբալ և տարածաշրջանային հարցերի շուրջ, այդ թվում և կլիմայական փոփոխության, առևտրի ու ներդրումների, խաղաղության և անվտանգության»:
Կանադայի վարչապետն ընդգծել է, որ մշակութային բազմազանությունը երկրի ամենամեծ ուժերից ու հպարտության աղբյուրներից մեկն է: «Ես բարձր եմ գնահատում Կանադայում հայ համայնքի պատրաստակամությունը՝ ողջունելու Սիրիայից եկած հազարավոր անձանց: Միասնաբար ողջունելով նորեկներին՝ մենք տևական ու կարևոր ձևով ուժեղացնում ենք մեր համայնքները»,- նշել է նա՝ իր, Կանադայի կառավարության և կնոջ՝ Սոֆիի անունից ևս մեկ անգամ շնորհավորելով Հայաստանի Հանրապետության Անկախության տոնը:
