Հոգևոր առաջնորդները պետք է կոչ անեն ԼՂ հակամարտող կողմերին դադարեցնել արյունահեղությունը. Պատրիարք Կիրիլ
3 րոպեի ընթերցում
ԵՐԵՎԱՆ, 8 ՍԵՊՏԵՄԲԵՐԻ, ԱՐՄԵՆՊՐԵՍ: Ադրբեջանի և Հայաստանի հոգևոր առաջնորդները պետք է կոչ անեն Լեռնային Ղարաբաղի հակամարտող կողմերին դադարեցնել արյունահեղությունը և հստակ քայլեր ձեռնարկեն նրանց հաշտեցնելու ու փախստականներին վերադարձնելու ուղղությամբ: Ինչպես հաղորդում է «Արմենպրես»-ը՝ վկայակոչելով «ՌԻԱ Նովոստի»-ն, Ամենայն Հայոց Կաթողիկոս Գարեգին Երկրորդի եւ Կովկասի մահմեդականների վարչության առաջնորդ շեյխուլիսլամ Ալլահշուքյուր Փաշազադեի հետ հանդիպման ժամանակ նման հայտարարությամբ հանդես է եկել Մոսկվայի և Համայն Ռուսիայի պատրիարք Կիրիլը:
«Իմ խորին համոզմունքն է, որ հոգևոր առաջնորդների դերն է կոչ անել հակամարտության կողմերին վերջ դնել արյունահեղությանը՝ հանուն իրենց քաղաքացիների թանկարժեք կյանքի պահպանման, և հստակ քայլեր ձեռնարկեն երկու կողմերին հաշտեցման, փախստականներին վերադարձնելու և նրանց անվտանգության ապահովման ուղղությամբ», - ասել է պատրիարքը:
Նա նշել է, որ շատ բարձր է գնահատում հոգևոր առաջնորդների եռակողմ հանդիպման հնարավորությունը, որոնց համար. «դժվար է հեռու մնալ շարունակվող ողբերգական հակամարտությունում »:
«Տառապանքներով եւ դառնությամբ է սիրտն արձագանքում կյանքի կորստին ռազմական գործողությունների ժամանակ: Այդ միջադեպերը դրդում են մեզ ևս մեկ անգամ ձայն բարձրացնել՝ ի պաշտպանություն խաղաղության», - նշել է Համայն Ռուսիո պատրիարքը:
Պատրիարքի խոսքով՝ ներկա իրավիճակը պարտադրում է մշակել և իրականացնել քայլեր՝ ուղղված երկու ժողովուրդների միջև վստահության հաստատմանը:
«Կարծում եմ՝ շատ կարևոր է բարոյական ազդեցություն ունենալ երիտասարդ սերնդի վրա: Երիտասարդությունը պետք է սովորի ապրել խաղաղությամբ, հարգել միմյանց՝ կարողանալով գտնել ընդհանուր լեզու, հակառակ դեպքում, երիտասարդները, ովքեր ծայրահեղ հայացքներ են ունենալու հարևանների նկատմամբ, կարող են հեշտությամբ ընկնել ծայրահեղականների ձեռքը: Քրիստոնյաների ու մուսուլմանների համար հատկապես կարևոր է միասին վկայել բարոյական արժեքների մասին, որոնք քարոզվում են մեր հավատքներով՝ սուրբ հավատի պարգևների եւ գթասրտության մասին, ինչպես նաև Աստծո ներկայության մասին մարդկության պատմության մեջ»,- ասել է պատրիարք Կիրիլը: