Բաբլոյանը բարձր է գնահատում ՀՀ Նախագահի մոտեցումը արտաքին քաղաքականության հարցերում
2 րոպեի ընթերցում
ԾԱՂԿԱՁՈՐ, 25 ՕԳՈՍՏՈՍԻ, ԱՐՄԵՆՊՐԵՍ: Հայաստանի իշխանությունների կողմից իրականացվող քաղաքականության շնորհիվ՝ Հայաստանը, լինելով ԵԱՏՄ-ի անդամ երկիր, կարողանում է սերտ համագործակցել Եվրամիության հետ: «Արմենպրես»-ի հաղորդմամբ՝ օգոստոսի 25-ին «Բազե» համահայկական հավաքի մասնակիցների հետ հանդիպման ժամանակ այս մասին նշեց Ազգային ժողովի նախագահ Արա Բաբլոյանը: Նրա խոսքով՝ Հայաստանը փոքր երկիր է և գտնվում է մի այնպիսի տարածաշրջանում, որտեղ միայն երկու պետությունների հետ են սահմանները բաց, իսկ երկու երկրների ծրագրերից մեկն է կործանել Հայաստանը:
«Այդ առումով պետք է բարձր գնահատել Հայաստանի իշխանության կողմից իրականացվող քաղաքականությունը, մասնավորապես՝ Հայաստանի Հանրապետության Նախագահի մոտեցումը, քանի որ նա ստեղծել է այնպիսի մթնոլորտ, որ Հայաստանը, լինելով ԵԱՏՄ-ի անդամ, կարողանում է սերտ համագործակցություն ունենալ ոչ միայն Եվրամիության, այլ նաև աշխարհի գերտերությունների և պետությունների հետ»,- ընդգծեց Բաբլոյանը:
ԱԺ նախագահի խոսքով՝ համադրման քաղաքականություն իրականացնել հեշտ չի և լուրջ դիվանագիտական և քաղաքական հմտության ու կամքի արդյունք է, որը տարիներ շարունակ իրականացվում է:
Հայաստանը հաստատակամ է Եվրոպական միության հետ Համապարփակ և ընդլայնված գործընկերության շրջանակային համաձայնագիրը ստորագրելու հարցում: