5 րոպեի ընթերցում
ԵՐԵՎԱՆ, 16 ՀՈՒԼԻՍԻ, ԱՐՄԵՆՊՐԵՍ: «Ոսկե ծիրան» Երևանի 14-րդ միջազգային կինոփառատոնն ամփոփեց մրցութային ծրագրերի արդյունքները: Հուլիսի 16-ին «Մոսկվա» կինոթատրոնում ժյուրիի կազմը փառատոնի փակման հանդիսավոր արարողության ընթացքում հայտարարեց մրցանակակիրներին: Երեկոն նշանավորվեց նաև «Ոսկե ծիրան» ՄԿՓ-ի կողմից Ռեժիսոր Ջո Բեռլինգերին «Վարպետ» հատուկ մրցանակի հանձմամբ: Միջոցառումը եզրափակվեց Բեռլինգերի «Բնաջնջման մտադրություն» (2017) ֆիլմի ցուցադրությամբ:
«Արմենպրես»-ի հաղորդմամբ` մրցանակների հանձնման արարողությունն իրրականացվեց Կոմիտասի ստեղծագործությունների ներքո:
Մեծանուն գրող Հրանտ Մաթևոսյանի անվան մրցանակը լավագույն սցենարի համար տրվեց ռեժիոր Քրիս Ավետիսյանի «Դոնալդը լաց եղավ» ֆիլմին:
Կինոքննադատների և լրագրողների միջազգային ասոցիացիայի` FIPRESCI-ի մրցանակին արժանացավ «Անկաշառը» կինոնկարը, ռեժիսոր Մոհամադ Ռասուլոֆ (Իրան):
Միջազգային խաղարկային մրցույթում ոսկե ծիրան-ի արժանացավ «Ցանկալի Դուրգան» կինոնկարը, ռեժիսորՍանալ Կումար Սասիդհարան (Հնդկաստան):
Արծաթե ծիրանը տրվեց «Արաբիա» կինոնկարին, ռեժիսոր Աֆոնսու Ուչոա/Ժուան Դումանս (Բրազիլիա):
Ժյուրիի հատուկ հիշատակում համարվեց «Վեսթերն» ժապավենը, ռեժիսոր Վալեսկա Գրիզեբախ (Գերմանիա /Բուլղարիա/Ավստրիա):
Միջազգային վավերագրական մրցույթում ոսկե ծիրանի արժանացավ «Ուրվականների որս» ֆիլմը, ռեժիսոր Ռաեդ Անդոնի (Ֆրանսիա/Պաղեստին/Շվեյցարիա/Քաթար):
Արծաթե ծիրանը հանձնվեց «Դերդո մայրիկը և ընկուզենին» կինոնկարին, ռեժիսորՍերդար Օնալ (Թուրքիա/Հայաստան):
Ժյուրիի հատուկ հիշատակում համարվեց «Գյուղացիներ» ֆիլմը,ռեժիսորՑվետան Դրագնև (Բուլղարիա):
Հայկական համայնապատկեր ազգային մրցույթում ոսկե ծիրանը հանձնվեց խաղարկային «Դոնալդը լաց եղավ» ֆիլմին, ռեժիսորՔրիս Ավետիսյան (ԱՄՆ):
Ժյուրիի հատուկ հիշատակում դեբյուտային դերակատարման համար արժանացավ երիտասարդ և խոստումնալիc դերասան Սամվել Թադևոսյանը,«Կյանք ու կռիվ» ժապավենում Տիգրանին մարմնավորելու համար, ռեժիսոր Մհեր Մկրտչյան (Հայաստան):
Լավագույն վավերագրական կինո ճանաչվեց և ոսկե ծիրանի արժանացավ«Ձյուն կար» ֆիլմը, ռեժիսոր Թամարա Ստեփաանյան (Ֆրանսիա/Հայաստան/Լիբանան):
Ժյուրիի հատուկ հիշատակում համարվեց «Օրիժին» կինոնկարը, ռեժիսոր Աշոտ Մկրտչյան (Հայաստան):
Լավագույն կարճամետրաժ ժապավեն համարվեց և ոսկե ծիրանի արժանացավ «Ջրի երեսին մնալ» ֆիլմը,ռեժիսոր Էրիկ Շահինյան (ԱՄՆ):
«Փառատոնի շրջանակում մի քանի ֆիլմ եմ դիտել և պետք է ընդգծեմ, որ «Ոսկե ծիրանն» իրական երևակայական հրավառություն էր, և նրանք, ովքեր չհաղորդակցվեցին փառատոնին, շատ բան կորցրեցին»,- «Արմենպրես»-ի հաղորդմամբ` նշեց ՀՀ մշակույթի նախարար Արմեն Ամիրյանը և հավելեց, որ հաջորդ տարի մենք կունենանք ֆիլմարտադրության նոր մոդել. ծրագիրը քննարկվել է բոլոր կինոարտադրողների հետ:
«Ոսկե ծիրան» կինոփառատոնի հիմնադիր-տնօրեն Հարություն Խաչատրյանի խոսքով` կինոյի բոլոր օջախները պետք է բռունցք դառնան ու համատեղ աշխատեն Հայաստանում ֆիլմարտադրությունը զարգացնելու նպատակով: «Պետք է միասին գործել, այլ ոչ իրար դեմ»,-շեշտեց նա:
«Ոսկե ծիրան» միջազգային կինոփառատոնը Երևանում տեղի ունեցող ամենամեծ մշակութային իրադարձություններից մեկն է: Հիմնվել է 2004 թվականին` «Ոսկե ծիրան» կինոյի զարգացման հիմնադրամի, Կինոգետների և կինոլրագրողների հայկական ասոցիացիայի կողմից։ «Ոսկե ծիրան»-ի հիմնադիրներն են փառատոնի գլխավոր տնօրեն կինոռեժիսոր Հարություն Խաչատրյանը, ծրագրերի տնօրեն, կինոքննադատ Միքայել Ստամբոլցյանը և գեղարվեստական տնօրեն, կինոքննադատ Սուսաննա Հարությունյանը։