ՀՀ-ում հաստատված սիրիահայերի ինտեգրման խնդիրները հեշտությամբ լուծվում են. Հրանուշ Հակոբյան

ԵՐԵՎԱՆ, 30 ՀՈՒՆԻՍԻ, ԱՐՄԵՆՊՐԵՍ: Սիրիական ճգնաժամի սկսվելուց ի վեր Հայաստան ժամանած սիրիահայերի ինտեգրման խնդիրները հեշտությամբ լուծվում են: Ազգային ժողովի արտաքին հարաբերությունների ու ֆինանսավարկային և բյուջետային հարցերի մշտական հանձնաժողովների համատեղ նիստում ՀՀ 2016թ. պետական բյուջեի կատարման հաշվետվության քննարկման ժամանակ այս մասին ասաց ՀՀ սփյուռքի նախարար Հրանուշ Հակոբյանը:

«Շուրջ 2000 երեխա սովորում է դպրոցներում, 500 երիտասարդ՝ բուհերում: Սիրիահայ ուսանողների ուսման վարձերի հարցում բարեգործական հիմնադրամների հետ միասին օգնում է պետությունը,- «Արմենպրես»-ի հաղորդմամբ՝ ասաց Հակոբյանը:

Հրանուշ Հակոբյանը հավելեց, որ նախարարությունը ստեղծել է նաև միասնական հարթակ, որտեղ սիրահայերին ուսուցանում են ՀՀ օրենսդրությունն ու բիզնես ծրագրեր:

Նախարարը նկատեց, որ սիրիահայերին նախարարության միջնորդությամբ ցածր տոկոսադրույքով՝ 4 տոկոսով են վարկեր տրամադրվում՝ 5 տարի մարման ժամկետով:

Հրանուշ Հակոբյանը նաև հայտնեց, որ սիրիական ճգնաժամի սկսվելուց ի վեր ՀՀ է ժամանել 22 հազար սիրիահայ: