1 րոպեի ընթերցում
ԵՐԵՎԱՆ, 14 ՀՈՒՆԻՍԻ, ԱՐՄԵՆՊՐԵՍ: Հայաստանի ազգային արխիվը տպագրության է ներկայացրել «Հայ եկեղեցու կալվածքներն Օսմանյան կայսրությունում» գիրքը: Այս մասին «Արմենպրես»-ի հետ զրույցում նշեց Հայաստանի ազգային արխիվի տնօրեն Ամատունի Վիրաբյանը: Նրա խոսքով՝ գրքում տեղ են գտել շատ կարևոր փաստաթղթեր:
«Դրանք բնագիր փաստաթղթեր են, թուրքական` մուրհակներ օսմաներեն գրված և կնքված: Մանրամասն ներկայացվում է, թե որ եկեղեցին ինչ կալվածք ունի: Դա կարող է լինել շենք-շինություն, խանութ, հողատարածք, դպրոց և այլն: Այդ ամենի վերաբերյալ բնագիր փաստաթղթերը մեզ մոտ են պահվում»,-ասաց Ամատունի Վիրաբյանը:
Նա նշեց, որ գրքում տեղ գտած փաստաթղթերը պահվում են Ազգային արխիվում, մասնագետները երկար ժամանակ դրանք ուսումնասիրում են: Գիրքը գտնվում է տպարանում և լույս կտեսնի առաջիկայում:
Ազգային արխիվի տնօրենը նշեց, որ իրենք կազմում են նաև շտեմարան 1915 թվականին Օսմանյան Թուրքիայում հայ ընտանիքների ունեցվածքի մասին: Ամատունի Վիրաբյանի խոսքով՝ իրենց մոտ պահվում են ընդամենը 300 հազար մարդու ունեցվածքի մասին տեղեկություններ, սակայն հասկանալի է, որ այդ տվյալներն ավելի շատ են: