2 րոպեի ընթերցում
ԵՐԵՎԱՆ, 11 ՄԱՅԻՍԻ, ԱՐՄԵՆՊՐԵՍ: ՀՀ վաստակավոր արտիստ Հարութ Փամբուկչյանը` սիրված երգիչ Ձախ Հարութը, ժամանել է Երևան: Նա մայիսի 20-ին մենահամերգով հանդես կգա Կ. Դեմիրճյանի անվան մարզահամերգային համալիրում:
«Արմենպրես»-ի հաղորդմամբ՝ երգչի հետ ելույթ կունենան հանրապետության լավագույն երաժիշտները:
Համերգի ընթացքում Ձախ Հարութի երկրպագուները հնարավորություն կստանան վայելելու նրա հին և սիրված երգեր, ինչպես նաև նոր ստեղծագործություններ: Սպասվում են նաև անակնկալներ:
Համերգը կազմակերպել է Yeghoyan Production-ը:
Հարութ Փամբուկչյանը ծնվել է 1950 թվականի հուլիսի 1-ին, Երևանում: Հայտնի է նաև Ձախ Հարութ անունով՝ ձախլիկ լինելու պատճառով: Վաղ տարիքից սովորել է կիթառ, սազ, բուզուկի, դհոլ ու դաշնամուր: Ավարտել է Երևանի թիվ 43 միջնակարգ դպրոցը, Փ. Թերլեմեզյանիանվան գեղարվեստի ուսումնարանը: Իր ստեղծած «Էրեբունի» խմբով ելույթներ է ունեցել տարբեր միջոցառումների շրջանակում և հանդես եկել բազմազան երգացանկով: 1975-ին կարճ ժամանակովմեկնել է Լիբանան, այնուհետև` ԱՄՆ, որտեղ թողարկել է առաջին ձայնասկավառակը` «Ուր էիր, Աստված» խորագրով: Երգացանկում ներառված են ազգագրական, ժողովրդական, պարային և այլ ստեղծագործություններ: Երկար տարիներ ապրում և ստեղծագործում է ԱՄՆ-ում: