ԵՐԵՎԱՆ, 3 ՄԱՅԻՍԻ, ԱՐՄԵՆՊՐԵՍ: «Մանչեսթեր Յունայթեդ»-ի չորս ֆուտբոլիստ՝ պաշտպաններ Ֆիլ Ջոնսը, Քրիս Սմոլինգը, Էրիկ Բեյին, ինչպես նաև կիսապաշտպան Պոլ Պոգբան Եվրոպայի լիգայի կիսաեզրափակչի «Սելտա»-ի դեմ խաղից առաջ վերադարձել են մարզումների: «Արմենպրես»-ի փոխանցմամբ` այդ մասին հաղորդում է Sky Sports-ը:
Ջոնսը և Սմոլինգը վնասվածք էին ստացել մարտին կայացած Գերմանիա-Անգլիա հանդիպման ժամանակ: «Մանչեսթեր Յունայթեդ»-ի կազմում նրանք վերջին անգամ խաղացել են Պրեմիեր լիգայի 19-րդ տուրում՝ «Միդլսբրո»-ի հետ խաղում:
Բեյին վնասվածք էր ստացել «Սուոնսի»-ի դեմ խաղում՝ նախորդ կիրակի: Նա, սակայն, կկարողանա մասնակցել «Սելտա»-ի հետ խաղին:
Պոգբան ևս այսօր նկատելի է եղել «մանկունիանցիներ»-ի մարզմանը: Ֆրանսիացին վնասվածքի պատճառով ստիպված էր բաց թողնել «Սուոնսի»-ի հետ մրցավեճը:
Եվրոպա Լիգայի քառորդ եզրափակչի «Սելտա»-«Մանչեսթեր Յունայթեդ» առաջին հանդիպումը կկայանա մայիսի 4-ին՝ Իսպանիայում: Այն կսկսվի Երևանի ժամանակով 23:00-ին: