ՀՀ-ում ռուսական ռազմաբազան լուրջ պատասխան է տարածաշրջանում Թուրքիայի հնարավոր սպառնալիքներին. նախարար
1 րոպեի ընթերցում
ԵՐԵՎԱՆ, 11 ՄԱՐՏԻ, ԱՐՄԵՆՊՐԵՍ: Հայաստանում ռուսական 102-րդ ռազմաբազայի առկայությունը լուրջ պատասխան է տարածաշրջանում Թուրքիայի կողմից հնարավոր սպառնալիքներին: Երևանում միջազգային երկխոսության «Վալդայ» ակումբի արտագնա նիստի ընթացքում այս մասին ասաց ՀՀ պաշտպանության նախարար Վիգեն Սարգսյանը՝ անդրադառնալով ռուս-թուրքական ջերմ հարաբերություններին և Հայաստանի վրա դրա ազդեցությանը: «Մենք ելնում ենք այն հանգամանքից, որ մի քանի շաբաթ առաջ ստորագրվեց հայ-ռուսական համատեղ խմբավորումների ստեղծման մասին համաձայնագիր և Հայաստանում 102-րդ ռազմական բազան հանդիսանում է լուրջ պատասխան տարածաշրջանում Թուրքիայի հնարավոր սպառնալիքներին»,- «Արմենպրես»-ի հաղորդմամբ՝ ասաց Վիգեն Սարգսյանը:
Նրա խոսքով՝ եթե Ռուսաստանին հաջողվի ունենալ կանխատեսելի ու հասկանալի Թուրքիա, դա կարող է բխել նաև Հայաստանի շահերից:
Նախարարը միաժամանակ նկատեց, որ հայ ժողովրդի շրջանում կա տխուր հիշողություն անցյալից, երբ սովետական իշխանությունները տարբեր պայմանագրեր են կնքել թուրքական կառավարության հետ: «Բայց, միևնույն ժամանակ, մենք պետք է դիտարկենք, թե ինչպես են ռուս-թուրքական հարաբերություններն անդրադառնալու տարածաշրջանի վրա»,- եզրափակեց նախարարը: