Աղջիկները տանը 40 տոկոսով ավելի շատ են աշխատում, քան տղաները. ՅՈՒՆԻՍԵՖ

ԵՐԵՎԱՆ, 7 ՀՈԿՏԵՄԲԵՐԻ, ԱՐՄԵՆՊՐԵՍ: Աղջիկները 5-ից մինչեւ 14 տարեկան հասակում 40 տոկոսով ավելի շատ ժամանակ են նվիրում տնային գործերին, քան նույն տարիքի տղաները, ինչի մասին վկայում են ՅՈՒՆԻՍԵՖ-ի ուսումնասիրությունները, տեղեկացնում Է «Արմենպրես»-ը՝ հղում անելով BBC-ին:

Արդյունքում՝ աղջիկներին ավելի քիչ ժամանակ Է մնում կրթություն ստանալու, զարգանալու, սոցիալիզացման եւ պարզապես զվարճությունների ու խաղերի համար:

Հիմնադրամի հաշվարկներով՝ ամբողջ աշխարհի աղջիկներն օրական 160 մլն ժամով ավելի շատ ժամանակ են ծախսում կերակուր պատրաստելու, մաքրության եւ իրենց ընտանիքի անդամների մասին հոգ տալու վրա, քան տղաները:

Այս խնդիրը հատկապես սուր Է ծառացած Հարավային Ասիայում, Մերձավոր Արեւելքում եւ Աֆրիկայի առանձին մասերում: Տնային գործերը խիստ անհավասար են բաշխված Եմենում, Սոմալիում եւ Բուրկինա Ֆասոյում:

Սոմալիում, օրինակ, 10-14 տարեկան աղջիկները տնային գործերին նվիրում են շաթաբական շուրջ 26 ժամ. դա նրանց գրեթե ողջ ազատ ժամանակն Է:

Տղաների եւ աղջիկների միջեւ տարբերությունները շատ վաղ են դրսեւորվում: ՅՈՒՆԵՍԿՕ-ի տվյալներով՝ 5-9 տարեկան աղջիկները 30 տոկոսով ավելի շատ ժամանակ են նվիրում տնային գործերին, քան տղաները:

Երեխաների մեծանալու հետ իրադրությունը միայն սրվում Է. 10-14 տարեկան աղջիկները տնային գործերին արդեն 50 տոկոսով ավելի շատ ժամանակ են նվիրում, քան նրանց հասակակից տղաները:

Փաստորեն մեծերն աղջիկների վրա են դնում իրենց պարտականությունների մի մասը, օրինակ՝ ընտանիքի կրտսեր երեխաների մասին հոգալը: Առանձին երկրներում աղջիկների վրա Է դրվում վառելափայտ հավաքելու եւ ջուր կրելու պատասխանատվությունը:

Փորձագետների կարծիքով, նման իրավիճակը միայն մեծացնում Է գենդերային անհավասարությունը եւ նվազեցնում կանանց ինքնահաստատման հնարավորությունը: