Արտասահմանցի մասնագետն ապշած է «Թումո»-ով ու կոչ անում ծրագրավորումը ներդնել տարրական դասարաններում

ԵՐԵՎԱՆ, 24 ՀՈՒՆԻՍԻ, ԱՐՄԵՆՊՐԵՍ: Մեծ ներուժ ունեցող հայկական տեխնոլոգիական ոլորտի խնդրահարույց ասպեկտների լուծման և զարգացման իր տեսլականն ունի ստարտափերի«Seedstars World» մրցույթի տարածաշրջանային ղեկավար Իգոր Օվչարենկոն:«Արմենպրես»-ի հետ զրույցում, անդրադառնալով ոլորտի համար անհրաժեշտ կադրեր ապահովելու հարցին, նա նշեց, որ հնարավոր է անել միայն դպրոցներումձեռնարկատիրական, ծրագրավորման դասընթացներ ներդնելու միջոցով: «Կա միջազգային կազմակերպություն, որը զբաղվում է երեխաների համար «code club»-ի հիմնադրմամբ, որտեղ վաղ տարիքից երեխաներին սովորեցնում են ծրագրավորում: Տեխնոլոգիական ուսուցումը պետք է կատարվի վաղ տարիքից, հետո շարունակվի ավելի բարձր դասարաններում, համալսարաններում. պետք է ստեղծել սեփական կադրերը, հետո ռացիոնալ օգտագործել: Գիտեմ, որ շատ կազմակերպություններ սեփական նախաձեռնությամբ մասնագետներ են պատրաստում, իրենք կազմակերպության ներսում ստեղծում են փոքր ինկուբատորներ, որտեղ նախագծեր են իրականացնում: Դա ճիշտ մոտեցում է, բայց եթե ավելի ինստիտուտցիոնալ մոտեցման մասին ենք խոսում, ապա դա պետք է արվի դպրոցներից վաղ տարիքից»,-նշեց Օվչարենկոն:

Դիտարկմանը, որ Հայաստանի դպրոցներում ստեղծվում են ինժեներական լաբորատորիաներ՝ Իգոր Օվչարենկոն հիացմունքով արձագանքեց: «Դա հիասքանչ է, այլ երկրներում նման բան չկա, ես ուղղակի ապշած եմ «Թումո»-ով, բայց իմ ուղերձն է, որ ծրագրավորումը տանել տարրական դասարաններ: Շատ ծրագրեր պարզապես օգնում են տրամաբանական մտածողությունը զարգացնել, իսկ բարձր դասարաններում ծրագրավորման այլ լեզուներին կարելի է ծանոթացնել: Պետք է պետության կողմից խթան լինի, ինչպես նաև այնպիսի կազմակերպություններից, ինչպիսին է, օրինակ, «Microsoft»-ը, որոնք կարող են մասնագետներին վերապատրաստել, ովքեր էլ իրենց հերթին աշակերտներ կպատրաստեն»,-հավելեց ՏՏ մասնագետը:

Ինչ վերաբերում է ստարտափների ու պետության միջև համագործակցության մոդելներին, ապա Իգոր Օվչարենկոյի կարծիքով՝ ճիշտ կլինի ներգրավել միջազգային կազմակերպությունների, որոնք կխթանեն ստարտափերի լուծումների ներդրումը պետական համակարգում: «ԱՄՆ-ում մասնավոր ծանոթությունների միջոցով է դա տեղի ունենում: Մարդիկ, ովքեր տեղյակ են ինչ-որ ստարտափերի մասին, որոնք հավելյալ արժեք կամ օգուտ կարող են տալ պետությանը, միջնորդում են այս երկու սեկտորների համագործակցության համար: ԱՊՀ տարածքում, կարծում եմ, այս մոդելը չի աշխատի: Ձեր դեպքում ճիշտ կլինի ներգրավել միջազգային կազմակերպությունների, որոնք կխթանեն նորարար գաղափարների ներդրումը պետական համակարգում: Ուկրաինայում, օրինակ, «Microsoft»-ը նորարարությունը մտցնում է պետական ապարատ: Պետք է մի խաղացող, որը կասի կա այսպիսի ստարտափ, որն առաջարկում է լավ ծառայություններ, ինչը թույլ կտա կրճատել ծախսերը այս կամ այն ոլորտում, որից էլ կօգտվի պետությունը»,-նշեց մեր զրուցակիցը:

Օվչարենկոյի խոսքով՝ նորարարական լուծումները լայնորեն կիրառելու տեսանկյունից օրինակելի փորձ ունի Էստոնիան: Այս երկրում վաղուց քվեարկությունն իրականացնում են առցանց եղանակով, «անգամ նախագահ կարելի է դառնալ վիրտուալ ձևով»: «Կարելի է միջազգային փորձն ուսումնասիրելով առաջ գնալ, ինչու հեծանիվ հորինել, եթե դա արդեն արվել է»,-եզրափակեց«Seedstars World»-ի տարածաշրջանային ղեկավարը:

«Seedstars World»-ը, որն աշխատում է 65 երկրի հետ, նախատեսում է ընդլայնել իր գործունեությունը, լինել ավելի շատ երկրներում,բացել գրասենյակներ: Դրանք կլինեն տարածաշրջանային կենտրոններ՝ համակարգելով մի քանի երկրների աշխատանքները: «Seedstars World»-ը Շվեյցարիայում ստեղծված մրցույթ է զարգացող շուկաների և արագ զարգացող ձեռնարկատիրական էկոհամակարգերի համար:

«Seedstars Երևան» մրցույթը Հայաստանում անցկացվում է արդեն երրորդ անգամ`համագործակցելով «Seedstars World»-ի հետ: Մրցույթի եզրափակիչը կկայանա հունիսի 25-ին, որտեղ 12 ստարտափեր կներկայացնեն իրենց նախագծերը: Նույն օրը կորոշվեն նաև «IBM ISTC Startup Challenge» ստարտափ մրցույթի հաղթողները: