3 րոպեի ընթերցում
ԵՐԵՎԱՆ, 16 ՀՈՒՆԻՍԻ, ԱՐՄԵՆՊՐԵՍ:«Արմենպրես» լրատվական գործակալությունը Լրատվական ռադիոյի եթերում ներկայացնում է այն ամենն, ինչի մասին կկարդաք, կլսեք ու կտեսնեք այսօրվա լրահոսում:
Տավուշի մարզի Դիլիջան համայնքի վարչական տարածքներում նախատեսվում է թույլատրել օճառի և օծանելիքի ու կոսմետիկ միջոցների արտադրություն: Այս հարցն ընգրկված է այսօր` հունիսի 16-ին, ՀՀ կառավարության կայանալիք նիստին: Այս նախագծի ընդունումը պայմանավորված է Դիլիջան համայնքի և հարակից տարածքների զարգացմամբ և ներդրումների խրախուսմամբ: Օճառի արտադրության մեջ բացակայում են վտանգավոր նյութերի և թափոնների առկայությունը, իսկ արտադրական գործընթացն իրականացվում է փակ ցիկլով, որի արդյունքում թափոններ չեն առաջանում:
ՀՀ կառավարության աջակցությամբ հունիսի 17-18-ը կանցկացվի «ԴիջիԹեք» բիզնես ֆորումը: Ֆորումի բացմանն ընդառաջ Ինֆորմացիոն տեխնոլոգիաների ձեռնարկությունների միության (ԻՏՁՄ) նախագահ Ալեքսանդր Եսայանը, գործադիր տնօրեն Կարեն Վարդանյանը, մեդիափորձագետ Սամվել Մարտիրոսյանն այսօր կներկայացնեն ֆորումի այս տարվա շեշտադրումները:
Հունիսի 18-19-ն էլ կանցկացվի հղի կանանց և մանուկների առողջության պահպանման և այլ խնդիրներին նվիրված «Կոալա» փառատոնը: Լրագրողների հետ հանդիպմանը կազմակերպիչներն այսօր կներկայացնեն փառատոնի օրակարգային հարցերը, կանդրադառնան անվտանգ հղիությանն, երեխաների առողջ մանկությանը:
Պարույր Սևակի ծննդավայրում՝ տուն-թանգարան տանող ճանապարհին հունիսի 17-ին կբացվի «Կոչեմ ապրողաց» խորագրով քանդակաշարի առաջին քանդակը` «Անլռելի զանգակատուն» պոեմի հիմքով` «Տո լա՜ճ տնավեր…» անվանված կոթողը: Այն նվիրված է մեծանուն գրողի ծննդյան 100-ամյակին: Իսկ այսօր քանդակաշարի հեղինակ ՀՀ.ժող վարպետ, նկարիչ խաչքարագործ Վարազդատ Համաբարձումյանը կներկայացնի ծրագրի մանրամասները:
Մեկնարկում է Միջազգային երաժշտական մրցույթների համաշխարհային ֆեդերացիայի 60-րդ գլխավոր վեհաժողովը։ Երևան են ժամանել աշխարհում մեծ հեղինակություն վայելող շուրջ 40 միջազգային երաժշտական մրցույթների տնօրեններ, գեղարվեստական ղեկավարներ, ներկայացուցիչներ, որոնք կքննարկեն երաժշտական աշխարհի ձեռքբերումները, մարտահրավերները։ Երեկոյան էլ «Արամ Խաչատրյան» համերգասրահում 60-րդ գլխավոր համաժողովի շրջանակում տեղի կունենա ֆեդերացիայի դափնեկիրների գալա համերգը։ Համերգը կղեկավարի Հայաստանի պետական երիտասարդական նվագախմբի գեղարվեստական ղեկավար և գլխավոր դիրիժոր Սերգեյ Սմբատյանը։
Այս և այլ թեմաների մասին կարող եք մանրամասն ընթերցել armenpress.am կայք էջում և լսել լրատվական ռադիոյի եթերում: Հետևեք մեզ թվիթերում և ֆեյսբուքում: