3 րոպեի ընթերցում
ԵՐԵՎԱՆ, 9 ՀՈՒՆԻՍԻ, ԱՐՄԵՆՊՐԵՍ:«Արմենպրես» լրատվական գործակալությունը Լրատվական ռադիոյի եթերում ներկայացնում է այն ամենն, ինչի մասին կկարդաք, կլսեք ու կտեսնեք այսօրվա լրահոսում:
ՀՀ կառավարության աշխատակազմը նախատեսում է կրճատել իրեն ամրացված 15 միավոր տրանսպորտային միջոցները: Այդ մասին որոշման նախագիծն ընդգրկված է այսօր` հունիսի 9-ին, կայանալիք կառավարության նիստի օրակարգում: Արդեն իսկ կառավարությունը կրճատել է ավելի քան 800 ծառայողական ավտոմեքենա:
Կառավարության նիստում կքննարկվեն այլ հարցեր ևս, իսկ ահա կառավարության շենքից դուրս կրկին բողոքի ակցիա է սպասվում: 33-րդ թաղամասի, կամ ինչպես հասարակության շրջանում է տարածված ասել, Ֆիրդուսի բնակիչները ՀՀ կառավարության շենքի մոտ բողոքի ցույցի են դուրս գալու:
ՆԱՏՕ-ի խորհրդարանական վեհաժողովում ՀՀ ԱԺ պատվիրակությունն ամփոփում է մայիսի 28-30-ը Տիրանայում կայացած ՆԱՏՕ ԽՎ-ի գարնանային նստաշրջանի աշխատանքների արդյունքները:
Հայաստանյան հասարակական դաշտը քննարկում է Թուրքիայի նախագահ Էրդողանին ուղղված Պոլսո Հայոց պատրիարքական փոխանորդ Արամ արքեպսիկոպոս Աթեշյանին նամակը: Պատրիարքական փոխանորդը Էրդողանին հայտնել էր, թե իբր Թուրքիայի հայ համայնքը Բունդեսթագի կողմից Հայոց ցեղասպանությունը ճանաչող բանաձևի ընդունման փաստը մեծ ցավով է ընդունել: Այսօր Կոմիտաս վարդապետ Հովնանյանը և ազգագրագետ Հրանուշ Խառատյանը կխոսեն թեմայի շուրջ և կանդրադառնան Մայր Աթոռ Սուրբ Էջմիածնի պատասխանին:
Հունիսի 11-ին մեկնարկում է «Երևանյան ամառ 2016» եռամսյա միջոցառումների ծրագիրը: Այսօր Երևանի քաղաքապետի օգնական Մարիա Բարաղամյանը և «Հայ խոհարարական ավանդույթների զարգացման և պահպանման» ՀԿ նախագահ Սեդրակ Մամուլյանը կներկայացնեն ծրագրի շրջանակում անցկացվելիք «Համով-հոտով Երևան» խորագրով 9-րդ փառատոնին առնչվող մանրամասներ:
Ինչ եղանակ է սպասվում Հայաստանում, երբ կդադարեն հորդառատ տեղումներն ու քամիները: Այս և այլ հարցերին կանդրադառնա ԱԻՆ Հիդրոմետ ծառայության օդերևութաբանության կենտրոնի պետ Զարուհի Պետրոսյանը:
«Առնո Բաբաջանյան» համերգասրահում կկայանա Ռիտա Շառոյանի «Հնագույն նվագարաններ» հեղինակային ֆիլմաշարի 9-րդ՝ «Բարի, գեղեցիկ, առաքինի» վավերագրական ֆիլմի պրեմիերան` նվիրված աշուղ Ջիվանու 170-ամյակին: Ֆիլմի բեմադրիչ Արմեն Ռոնով-Մկրտչյան:
Հունիսի 9-ին մեկնարկում է 2016 թվականի ՀՀ Հեծանվային մարզաձևի մեծահասակների և երիտասարդների առաջնությունը: Այն անցկացվում է ՀՀ հեծանվային մարզաձեւերի ֆեդերացիայի կողմից:
Այս և այլ թեմաների մասին կարող եք մանրամասն ընթերցել armenpress.am կայք էջում և լսել լրատվական ռադիոյի եթերում: Հետևեք մեզ թվիթերում և ֆեյսբուքում: