«Նոր գիրք» 3/13. «Կարմիր ժապավենը»

ԵՐԵՎԱՆ, 6 ՀՈՒՆԻՍԻ, ԱՐՄԵՆՊՐԵՍ: «Արմենպրես» լրատվական գործակալությունը շարունակում է ներկայացնել «Նոր գիրք» նախագիծը: Այն տեղեկություններ է հաղորդում հայաստանյան հրատարակչությունների լույս ընծայած գեղարվեստական գրքերի մասին: Գործակալության էջերում ընթերցասերները հնարավորություն ունեն տեղեկատվություն ստանալ և ծանոթանալ դասական երկերին ու արդի գրականության զարգացման միտումներին: Մեր տարատեսակ ցանկերից ընտրեցեք գրքեր և սկսեք ընթերցել:

Այս շաբաթ «Արմենպրես»-ը դարձյալ առանձնացրել է նոր հրատարակված երկու ուշագրավ գիրք:

Ֆրանսիական գրականություն

Ժան-Քրիստոֆ Ռյուֆեն, «Կարմիր ժապավենը»

«Կարմիր ժապավենը» վեպ է մի մարդու մասին, ով հոգեբանորեն չի հաղթահարել պատերազմը՝ անկախ դրա ելքից: Պատմությունը ցույց է տալիս, որ նրա իսկ ներսում ծագած պատերազմը երբեք չի ավարտվի...

Ֆրանսերենից թարգմանել է Ռուզան Միրզոյանը: Գիրքը հրատարակել է «Անտարես»-ը:

Հայ գրականություն

Գուրգեն Մահարի, «Երկերի լիակատար ժողովածու 15 հատորով», հատոր 9

Մանրաքանդակներ, հուշեր, ուղեգրություններ: Գուրգեն Մահարու Երկերի լիակատար ժողովածուի իններորդ հատորում ընդգրկված են և իրենց ամբողջական ամփոփումն են ստացել մահարիական այնպիսի ինքնատիպ ժանրերի ստեղծագործություններ, ինչպիսիք են մանրաքանդակները և հուշերը: Դրանց զգալի մասն անտիպ է կամ հավաքված պարբերական մամուլից և տարբեր արխիվներից՝ ներկայացվում է առաջին անգամ: Առաջին անգամ է ներկայացվում նաև ուղեգրությունների շարքը, որը սկիզբ է առել նախախորհրդային տարիներին և առիթներով շարունակվել գրողի ողջ կյանքի ընթացքում:

Գիրքը լույս է տեսել Գրիգոր Աճեմյանի աշխատասիրությամբ:

Հատորի խմբագիրներն են Վարդան Մատթէոսեանը և Արքմենիկ Նիկողոսյանը: Այն հրատարակել է «Անտարես»-ը:

«Նոր գիրք»-ը ներկայացրեց Լուսինե Ղազարյանը