«Ավրորա»-ի մրցանակակիր Մարգարիտ Բարանկիցեն ելույթ կունենա Թուրքիայում ընթացող ՄԱԿ-ի գագաթնաժողովում

ԵՐԵՎԱՆ, 23 ՄԱՅԻՍԻ, ԱՐՄԵՆՊՐԵՍ: «Ավրորա» համաշխարհային մարդասիրական մրցանակին արժանացած Մարգարիտ Բարանկիցեն ելույթ կունենա ՄԱԿ-ի Մարդասիրական համաշխարհային գագաթնաժողովում, որին մասնակցուm են քաղաքական և մարդասիրական ոլորտների 5000 ներկայացուցիչ:Ինչպես հաղորդում է «Արմենպրես»-ը` վկայակոչելովauroraprize.com-ը, Մարգարիտ Բարանկիցեն իր` որպես «Ավրորա» մրցանակի դափնեկիր առաջին հանրային ելույթում խոսելու է այն մասին, թե ինչպես են հակամարտություններից տուժած համայնքները տեղական նախաձեռնությունների միջոցով ուղղակիորեն ազդում մարդասիրական գործում ներգրավվածության վրա՝ փոխելով վերջինիս կանոնները։

Ստամբուլում անցկացվող երկօրյա գագաթնաժողովի ընթացքում Մարգարիտը կմասնակցի «Կենտրոնում մարդիկ են» խորագրով հատուկ նիստին, որի նպատակներն առաջադրելիս ՄԱԿ-ը նշել է. «Գագաթնաժողովը պետք է ընդգծի մարդասիրական ձեռնարկումների տրամաբանության այն մեծ տեղաշարժը, որով մարդասիրական ցանկացած արձագանքի շարժիչ ուժը պիտի դառնա տուժածներին իրական լիազորությունների տրամադրումը»։

Բուրունդիի քաղաքացիական պատերազմի ընթացքում 30.000 որբացած երեխաների փրկած Մարգարիտն ապացուցում է, որ անհատը կարող է հազարավոր մարդկանց կյանքում էական դրական փոփոխություն բերել։

Հայաստանում ապրիլի 24-ին Մարգարիտ Բարանկիցեին շնորհվել է «Ավրորա» համաշխարհային մարդասիրական մրցանակը, որը տրվել է Հայոց ցեղասպանությունը վերապրողների անունից՝ ի երախտագիտություն նրանց փրկողների:2017թ. «Ավրորա» համաշխարհային մրցանակի առաջադրումը կմեկնարկի հունիսի 1-ին։

Առաջին անգամ կազմակերպված Մարդասիրական համաշխարհային գագաթնաժողովը, որը նախաձեռնել է ՄԱԿ-ի գլխավոր քարտուղար Բան Կի-Մունը, տեղի է ունենում Թուրքիայում մայիսի 23- 24-ը։