Իվետա Մուկուչյանը ելույթից առաջ մարտական է տրամադրված

ԵՐԵՎԱՆ, 9 ՄԱՅԻՍԻ, ԱՐՄԵՆՊՐԵՍ: «Եվրատեսիլ- 2016»-ին Հայաստանը ներկայացնող երգչուհի Իվետա Մուկուչյանը ելույթից առաջ մարտական է տրամադրված: Այս մասին Ստոկհոլմից «Արմենպրես»-ի հետ զրույցում նշեց երգչուհին:

«Ելույթից առաջ շատ դրական տրամադրություն ունեմ, շատ հանգիստ եմ: Տրամադրվածությունս շատ մարտական է, եւ ափսոսում եմ, որ բեմի վրա ընդամենը երեք րոպե ունեմ ներկայացնելու իմ երգը, իմ զգացողությունները: Մի տեսակ լուրջ մտերմություն է սկսվել իմ եւ այդ հսկայական եվրտեսիլյան բեմի միջեւ: Երբ իջնում եմ բեմից, ցանկանում եմ անմիջապես նորից բարձրանալ»,-նշեց նա:

Իվետա Մուկուչյանն ընդգծեց, որ շատ է սիրել Ստոկհոլմը: «Այն ինձ հիշեցնում է Համբուրգ քաղաքը, որտեղ ապրում եմ: Ստոկհոլմը բավական նման է Համբուրգին իր կառուցվածքով, էներգիայով»,-հավելեց նա:

Հայ պատվիրակը փաստում է, որ բեմը կիսում է տաղանդավոր արտիստների հետ: «Անկախ մրցույթի տրամաբանությունից եւ դրա թելադրած կանոններից, ես հիշում եմ, որ սա կյանքի մի փուլ է, որ յուրաքանչյուր մասնակցի համար անմոռանալի է լինելու ողջ կյանքի ընթացքում: Այդ իսկ պատճառով ցանկանում եմ քաղել առավելագույնը: Ես բեմը կիսում եմ իսկապես շատ լավ եւ տաղանդավոր արտիստների հետ, ում հետ հաճելի է ոչ միայն ելույթ ունենալ, այլեւ անմիջական շփումներ ունենալ»,-շեշտեց նա:

Հայաստանի հանրային հեռուստաընկերության ստեղծագործական խմբի որոշմամբ՝ «Եվրատեսիլ- 2016»-ին Հայաստանը կներկայացնի երգչուհի Իվետա Մուկուչյանը: Միջազգային հանրությանը Իվետան կներկայանա գերզգացմունքային LoveWave ստեղծագործությամբ: Երգի միջազգային մրցույթը կկայանա մայիսի 10-ին, 12-ին եւ 14-ին Շվեդիայի մայրաքաղաք Ստոկհոլմում: Հայաստանը ելույթ կունենա մայիսի 10-ին առաջին կիսաեզրափակիչ ընթացքում՝ 7-րդ համարի ներքո: «Եվրատեսիլ-2016»-ին կմասնակցեն 42 երկրների ներկայացուցիչներ: Մրցույթի այս տարվա կարգախոսն է Come together (Միավորվենք):