3 րոպեի ընթերցում
ԵՐԵՎԱՆ, 6 ԱՊՐԻԼԻ, ԱՐՄԵՆՊՐԵՍ: «Արմենպրես» լրատվական գործակալությունը Լրատվական ռադիոյի եթերում ներկայացնում է այն ամենն, ինչի մասին կկարդաք, կլսեք ու կտեսնեք այսօրվա լրահոսում:
Այսօր` ապրիլի 7-ին, Ռուսաստանի վարչապետ Դմիտրի Մեդվեդևը պաշտոնական այցով կժամանի Երևան: Նախատեսված է Դմիտրի Մեդվեդևի այցելություն Հայոց ցեղասպանության զոհերի հիշատակը հավերժացնող Ծիծեռնակաբերդի հուշահամալիր, հանդիպում Հայաստանի վարչապետ Հովիկ Աբրահամյանի հետ և համատեղ հայտարարություն:
Կրակի դադարեցում. օր երկրորդ: Հայաստանի և Լեռնային Ղարաբաղի հանրապետությունների պաշտապանական գերատեսչությունները շարունակելու են տեղեկատվություն տրամադրել ղարաբաղա-ադրբեջանական շփման գծում տիրող իրավիճակի վերաբերյալ:
Ղարաբաղյան հարցը քննարկումների կիզակետում: ԵՊՀ քաղաքական ինստիտուտների և գործընթացների ամբիոնի վարիչ, քաղաքական գիտությունների դոկտոր, պրոֆեսոր Գարիկ Քեռյանը, Գլոբալիզացիայի եւ տարածաշրջանային համագործակցության վերլուծական կենտրոնի նախագահ Ստեփան Գրիգորյանը կանդրադառնան ղարաբաղա-ադրբեջանական շփման գծում Ադրբեջանի սադրիչ գործողություններին, միջազգային հանրության արձագանքին, ինչպես նաև հայկական կողմի անելիքներին:
Ղարաբաղյան թեման կշարունակ քննարկել կանայք: Ազատամարտիկ, փոխգնդապետ, «Կին ազատամարտիկների միության» նախագահ Աիդա Սերոբյանը, ՀՀ ԱԺ ՀՀԿ խմբակցության պատգամավոր Ռուզաննա Մուրադյանը, «Անահիտ» ջոկատի հրամանատար, փոխգնդապետ Անահիտ Մարտիրոսյանը և այլք իրենց դիտարկումները կներկայացնեն պատերազմական իրավիճակում կնոջ դերի մասին:
Գլոբալ տարածաշրջանային զարգացումների համատեքստում ղարաբաղյան հարցին կանդրադառնան դիվանագետ, արաբագետ, «Առաքյալներ» ՀԿ նախագահ Խաժակ Թոմոյան, ՀՀ ԳԱԱ Արևելագիտության ինստիտուտի թուրքիայի բաժնի ավագ գիտ.աշխատող, պատմական գիտությունների թեկնածու Քրիստինե Մելքոնյանը:
Այլ թեմաների մասին: Արա Սարգսյանի և Հակոբ Կոջոյանի տուն-թանգարանում կանցկացվի հուշ-երեկո` նվիրված մեծավաստակ քանդակագործ Արա Սարգսյանի ծննդյան 114-ամյակին: Նախատեսված են թանգարանի օծման արարողություն, հեղինակի մասին ֆիլմի դիտում, մշակութային այլ ծրագրեր:
Տեղի կունենա Գևորգ Թամամյանի «Դրախտ օվկիանոսի մեջտեղում» կամ «Արտադրված է Թայվանում» գրքի շնորհանդեսը: Գիրքը գրվել է հինգ երկրում: Գրքում ճամփորդական հիշողություններ են, ուր բացահայտվում է մի անծանոթ երկրի ու ժողովրդի մշակույթ՝ իր ինքնատիպ դիմագծով:
Այս և այլ թեմաների մասին կարող եք մանրամասն ընթերցել armenpress.am կայք էջում և լսել լրատվական ռադիոյի եթերում: Հետևեք մեզ թվիթերում և ֆեյսբուքում: