4 րոպեի ընթերցում
ԵՐԵՑԱՆ, 4 ԱՊՐԻԼԻ, ԱՐՄԵՆՊՐԵՍ: «Արմենպրես» լրատվական գործակալությունը Լրատվական ռադիոյի եթերում ներկայացնում է այն ամենն, ինչի մասին կկարդաք, կլսեք ու կտեսնեք այսօրվա լրահոսում:
Հայաստանյան քաղաքական դաշտը, քաղաքական գործիչներն արձագանքում են ղարաբաղա-ադրբեջանական շփման գծում Ադրբեջանի սադրիչ գործողություններին: Այսօր` ապրիլի 4-ին, քաղաքագետ Ալեքսանդր Իսկանդարյանը, Ազգային անվտանգություն» կուսակցության նախագահ Գառնիկ Իսագուլյանը, Հետախուզադիվերսիոն առաջին ջոկատի հիմնադիր-հրամանատար Վովա Վարդանովը, ԱԺ պատգամավոր Լյուդմիլա Սարգսյանը և այլ գործիչներ կանդրադառնան սահմանային լարված իրավիճակին, հայկական կողմի անելիքներին, միջազգային հանրության դիրքորոշմանը:
Հայաստանում մեկնարկել է «Արդարադատության մոնիտորինգ» ծրագիրը, որի հիմնական նպատակն է աջակցել արդարադատության համակարգում գիտելիքահեն քաղաքականություն իրականացնելուն, բացահայտել արդարադատության համակարգից քաղաքացիների ակնկալիքներն ու նրանց խնդիրները: Ծրագիրը պետք է օգնի նաև ՀՀ կառավարությանը կատարել իր միջազգային պարտավորությունները՝ փակ հաստատություններում գտնվող անձանց նկատմամբ վատ վերաբերմունքի և խոշտանգման բացառման ուղղությամբ՝ համաձայն Մարդու Իրավունքների Եվրոպական Կոնվենցիայի 3-րդ հոդվածի: Հայաստանի Հանրապետությունում Եվրոպական Միության պատվիրակության և ՀՀ Արդարադատության նախարարության ներկայացուցիչները կներկայացնեն ծրագրի մանրամասները:
Ապրիլի 4-ն Ինտերնետի համաշխարհային օրն է: Օրվա կապակցությամբ ոլորտի տարբեր մասնագետներ կխոսեն ինտերնետի կարևորության, հնարավոր խնդիրների մասին, ինչպես նաև կներկայացնեն ինտերնետից օգտվողների վիճակագրություն:
Որքանո՞վ է իրատեսական գազի գնի իջեցումը։ Այսօր տնտեսագետ Վարդան Բոստանջյանն է անդրադառնալու Հայաստանում գազի գնի հավանական իջեցմանը: Ինչպես նաև կներկայացնի, թե գազի գնի նվազեցումը ինչ ազդեցություն կթողնի թե սպառողի, թե տնտեսության տարբեր հատվածների վրա:
ՀՀ-ում կանանց ձեռներեցության զարգացման հեռանկարներին նվիրված քննարկում` Երևանում: Քննարկումը կազմակերպվում է «Կանանց սոցիալ-տնտեսական հզորացում Հայաստանում» ծրագրի շրջանակում, որն իրականացվում է Հայաստանի երիտասարդ կանանց ասոցիացիայի կողմից: Քննարկմանը կմասնակցեն միջազգային և պետական կառույցների ՀԿ-ների ներկայացուցիչներ, կին ձեռներեցներ՝ Հայաստանի տարբեր մարզերից:
Լրանում է Հայաստանում հրեական համայնքի ստեղծման 25-րդ տարին: Այդ կապակցությամբ հրեական համայնքի ներկայացուցիչները կազմակերպում են կլոր սեղան-քննարկում: Նախատեսվում են մասնակիցներ նաև Իսրայելի խորհրդարանից:
Այսօր կանցկացվի «Երևանյան հեռանկարներ» միջազգային երաժշտական փառատոնի 2016 թվականի առաջին մամուլի ասուլիսը: Փառատոնի նախագահ-կոմպոզիտոր Ստեփան Ռոստոմյանը, Բրյուսելի «Բոզար» արվեստների պալատի նախագահ և գեղարվեստական ղեկավար Փոլ Դուջարդինը, փառատոնի գլխավոր մենեջեր Սոնա Հովհաննիսյանը կներկայացնեն փառատոնի 2016-2017 թթ. ծրագրերը, կհայտարարեն տասնհինգամյակի հոբելյանական երեկոյի մանրամասները, ինչպես նաև փառատոնի միջազգային համագործակցության արդյունքները և ռազմավարությունը:
Այս և այլ թեմաների մասին կարող եք մանրամասն ընթերցել armenpress.am կայք էջում և լսել լրատվական ռադիոյի եթերում: Հետևեք մեզ թվիթերում և ֆեյսբուքում: