4 րոպեի ընթերցում
ԵՐԵՎԱՆ, 21 ՄԱՐՏԻ, ԱՐՄԵՆՊՐԵՍ: «Արմենպրես» լրատվական գործակալությունը Լրատվական ռադիոյի եթերում ներկայացնում է այն ամենն, ինչի մասին կկարդաք, կլսեք ու կտեսնեք այսօրվա լրահոսում:
Մարտի 21-ը Անտառների պահպանության միջազգային օրն է: Այսօր «Հայանտառ» ՊՈԱԿ-ի տնօրեն Մարտուն Մաթևոսյանը, բնապահպան Կարինե Դանիելյանը, աշխարհագրական գիտությունների դոկտոր, պրոֆեսոր Հովիկ Սայադյանը կխոսեն անտառվերականգնողական ծրագրերից և կանդրադառնան ոլորտում առկա խնդիրներին:
Արցախն օրերս առանձին տաղավարով մասնակցել է ITB-Berlin միջազգային զբոսաշրջային ցուցահանդեսին: Այդ կապացկությամբ Ադրբեջանը բողոք էր ներկայացրել և փորձել խնդիրներ ստեղծել Արցախի ներկայացուցիչների համար: Արցախի էկոնոմիկայի նախարարի տեղակալ Սերգեյ Շահվերդյանը, նախարարության զբոսաշրջության վարչության ծրագրերի պատասխանատու Արտակ Գրիգորյանն այսօր լրագրողների հետ հանդիպմանը կանդրադառնան այդ միջադեպին և կներկայացնեն Արցախի առաջիկա մասնակցությունը միջազգային զբոսաշրջային ցուցահանդեսներին:
Շարունակում է քննարկվել «Ընտրական օրենսգրքի» փոփոխությունների նախագիծը: ԱԺ ՀՀԿ խմբակցության անդամներ Խոսրով Հարությունյանն ու Շիրակ Թորոսյանը, ինչպես նաև Միջազգային և անվտանգության հարցերի հայկական ինստիտուտի հիմնադիր, քաղաքական վերլուծաբան Ստեփան Սաֆարյանը կանդրադառնան «Ընտրական օրենսգրքի» նախագծի վիճահարույց դրույթներին, ինչպես նաև ընտրական գործընթացների նկատմամբ հասարակության վստահությունը բարձրացնող առաջարկներին:
Մարտի 21-ն ամբողջ աշխարհում նշվում է որպես Տիկնիկային թատրոնի օր: Ինչո՞վ է ապրում ու շնչում Երեւանի տիկնիկային թատրոնը. թատրոնի անցյալը, ներկան ու ապագան: Երեւանի Հովհ.Թումանյանի անվան պետական տիկնիկային թատրոնի տնօրեն, ՀՀ արվեստի վաստակավոր գործիչ Ռուբեն Բաբայանը եւ դերասանուհի, մնջախաղաց Իննա Հախնազարյանը կանդրադառնան թեմային:
Մարտի 21-ը Անտառների պահպանության, ինչպես նաև Տիկնիկային թատրոնի օր լինելուց բացի, նաև Պոեզիայի միջազգային օրն է: Այդ առիթով այսօր նախատեսված են մի շարք միջոցառումներ: Ե.Չարենցի տուն-թանգարանը, Խնկո Ապոր անվան ազգային մանկական գրադարանը, Ե.Չարենցի անվան թիվ 67 հիմնական դպրոցը կանցկացնեն գրական-երաժշտական ցերեկույթ՝ նվիրված Պոեզիայի օրվան: Միջոցառման ընթացքում կընթերցվեն դասական և ժամանակակից պոետների բանաստեղծություններ և կհնչեն դրանց հիման վրա գրված երաժշտական ստեղծագործություններ: Միջոցառման ավարտին կանցկացվի վիկտորինա, որի հաղթողները կարժանանան մրցանակների:
Պոեզիայի միջազգային օրվա շրջանակում կանցկացվի ցերեկույթ` նվիրված բանաստեղծ, երաժիշտ, փիլիսոփա Ջիվանու 170-ամյակին: Կհնչեն Ջիվանու երգերը, բանաստեղծությունները: Օրվա ընթացքում սպասվում են նաև այլ միջոցառումներ:
Լրագրողներին կհանդիպի նաև աստղաբան, էզոթերիկ Գուրգեն Հովհաննիսյանը: Նա կանդրադառնա աստղաբանական նոր տարվա մեկնարկին:
Այս և այլ թեմաների մասին կարող եք մանրամասն ընթերցել armenpress.am կայք էջում և լսել լրատվական ռադիոյի եթերում: Հետևեք մեզ թվիթերում և ֆեյսբուքում: