1 րոպեի ընթերցում
ԵՐԵՎԱՆ,4 ՓԵՏՐՎԱՐԻ, ԱՐՄԵՆՊՐԵՍ:Պետական գաղտնիքներ «Ֆեյսբուք»-ով փոխանցելը վերջին բանն է, որ կարելի է անել: Այս մասին լրագրողների հետ զրույցում փետրվարի 4-ին նշեց տեղեկատվական անվտանգության փորձագետ Սամվել Մարտիրոսյանը:
«Ֆեյսբուք»-ն ստեղծված չէ գաղտնի խոսակցությունների համար, որովհետև գաղտնիությունը ենթադրում է նամակագրությունը ոչնչացնելու հնարավորություն: Բայց եթե նույնիսկ շատ լավ գաղտնիություն պահեք «Ֆեյսբուք»-ում, չեք կարող ջնջել դիմացինի գրածները»,-«Արմենպրես»-ի փոխանցմամբ` նշեց Սամվել Մարտիրոսյանը:
Մասնագետի խոսքով` իհարկե, սոցիալական ցանցն ունի շատ լավ ստեղծված անվտանգության համակարգ, որը կարելի է կիրառել:
«Բավականին անվտանգ կարելի է լինել: Բայց ֆեյսբուքյան վիրուսները ստեղծված են բոլոր անվտանգության համակարգերը շրջանցելու համար: Եթե ձեր «Ֆեյսբուք»-ը վարակվել է վիրուսով, մնացածը երկրորդական է: Ոչ մի գաղտնի բան չպետք է ֆեյսբուքով գրվի, չի էլ նախատեսված»,-հավելեց նա: