363.41
Բանգլադեշի նորանշանակ դեսպանը հավատարմագրերի պատճենն է հանձնել ԱԳ նախարարի տեղակալին
2 րոպեի ընթերցում
ԵՐԵՎԱՆ, 21 ՀՈՒՆՎԱՐԻ, ԱՐՄԵՆՊՐԵՍ:Հայաստանում Բանգլադեշի Ժողովրդական Հանրապետության նորանշանակ դեսպան Ջասիմ Ուդինը (նստավայրը` Աթենք) հունվարի 21-ինհավատարմագրերի պատճենն է հանձնել ԱԳ նախարարի տեղակալ Սերգեյ Մանասարյանին։
Ինչպես «Արմենպրես»-ին տեղեկացրին ՀՀ արտաքին գործերի նախարարության մամուլի, տեղեկատվության եւ հասարակայնության հետ կապի վարչությունից, ողջունելով հյուրին՝ փոխնախարար Մանասարյանը բարձր է գնահատել Հայաստանում առաջին դեսպան նշանակելու Բանգլադեշի իշխանությունների որոշումը: Փոխնախարարը հաջողություն է մաղթել դեսպանին իր առաքելության իրականացման ընթացքում՝ հույս հայտնելով, որ դեսպանն իր կարևոր ներդրումը կունենա երկկողմ համագործակցության ձևավորման և ընդլայնման գործում։
Դեսպանը, շնորհակալություն հայտնելով ընդունելության և բարեմաղթանքների համար, հավաստիացրել է, որ պաշտոնավարման ընթացքում առավելագույն ջանքերը կգործադրի Հայաստանի և Բանգլադեշի միջև հարաբերությունների զարգացման համար։
Հանդիպման ընթացքում փոխնախարար Մանասարյանը և դեսպան Ուդինը անդրադարձել են քաղաքական, տնտեսական, կրթական և մշակութային փոխգործակցությանն առնչվող հարցերի լայն շրջանակի: Այդ համատեքստում երկուստեք կարևորվել է փոխայցելությունների կազմակերպումը, արտգործնախարարությունների միջև խորհրդակցությունների անցկացումը, ինչպես նաև փոխգործակցությունը միջազգային կառույցների շրջանակներում։
Բաժանորդագրվեք մեր ալիքին Telegram-ում