Գաբրիել Ղազարյանը սպորտային տարին հաջողված է համարում

ԵՐԵՎԱՆ, 22 ԴԵԿՏԵՄԲԵՐԻ, ԱՐՄԵՆՊՐԵՍ:ՀՀ սպորտի և երիտասարդության հարցերի նախարար Գաբրիել Ղազարյանը հաջողված է համարում 2015 թվականը սպորտի բնագավառում՝ նշելով, որ երկիրն ունեցել է մի շարք նվաճումներ:«Արմենպրես»-ի փոխանցմամբ՝ այդ մասին նախարարը նշեց տարվա ամփոփիչ ասուլիսում՝ ավելացնելով նաև, որ գլխավոր գնահատականը, սակայն, տալու է հանրությունը:

Անդրադառնալով կատարված աշխատանքներին՝ նախարարը նշեց, որ կառավարության ֆինանսավորմամբ հանրապետության բազմաթիվ սպորտային մարզադպրոցներ ստացել են անհրաժեշտ գույք, իսկ ծրագիրը 2016-ին կրելու է շարունակական բնույթ:

Խոսելով ֆեդերացիաների հետ համագործակցության մասին՝ նախարարն ասաց, որ ձևավորվել է սերտ փոխգործակցություն, իսկ ֆեդերացիաների գործունեության շուրջ առկա է նկատելի առաջընթաց: «Օրինակ, թենիսի առաջնությունն այս տարի անցկացվել է Գյումրիում, ինչը մեծացրել է այդ մարզաձևի մասսայականացումը: Յուրաքանչյուր ֆեդերացիա իր աշխատանքն է կատարում. գտնում եմ, որ թերացումները պարզապես չստացվելու արդյունք են: Մի շարք ֆեդերացիաներ մեծ առաջընթաց են գրանցել, օրինակ՝ մարմնամարզության, լողի, հրաձգության: Մասնավորապես, մարմնամարզությունում արդեն իսկ ունենք Ռիո-2016-ի՝ Օլիմպիական խաղերի մեկ վարկանիշ: Հույս ունենք, որ այս սպորտաձևում կունենանք ևս երկու վարկանիշ: Ակնկալվում է լողում ևս ձեռք բերել մեկ վարկանիշ: Չեմ ցանկանում տարանջատել, իսկ Ֆեդերացիաների աշխատանքների լավագույն գնահատականներն արդյունքներն են»,- ասաց նախարարը:

Միաժամանակ, նա նշեց, որ գալիք տարում ֆեդերացիաներին հատկացվելիք ֆինանսաավորումը չի փոխվելու, նախարարության մի շարք ծրագրերի համար կառավարության հատկացվելիք գումարը, սակայն ավելացել է:

Գաբրիել Ղազարյանը ձեռքբերումների շարքին է դասում նաև Երևանում կիսամարաթոնի անցկացումը, որը ևս կրելու է շարունակական բնույթ: Նախարարը խոստացավ հետագայում շտկել կիսամարաթոնի ընթացքում արձանագրված թերությունները, իսկ միջոցառումը վերածել մարաթոնի:

2015 թվականին պետական աջակցության ծրագրում ընդգրկված 32 մարզական ֆեդերացիաներն անցկացրել են ՀՀ93 առաջնություն, 127 ուսումնամարզական հավաք, մասնակցել են Եվրոպայի, աշխարհի առաջնությունների և միջազգային 147մրցաշարարերի: 2015-ին ՀՀ հավաքական թիմերի մարզիկները 12 մարզաձևերից (ազատ ոճի ըմբշամարտ, հունահռոմեական ըմբշարմարտ, թաեքվանդո, ձյուդո, հրաձգություն, բռնցքամարտ, ծանրամարտ, շախմատ, սամբո, ուշու, մարմնամարզություն, հեծանվային սպորտ) աշխարհի և Եվրոպայի առաջնություններում նվաճել են 37 ոսկե, 45 արծաթե և 56 բրոնզե մեդալ, ընդհանուր հաշվարկով 138 մեդալ: Աշխարհի չեմպիոն է դարձել հունահռոմեական ըմբշամարտից Արթուր Ալեքսանյանը, Եվրոպայի չեմպիոն՝ Տիգրան Մարտիրոսյանը՝ ծանրամարտից և Տիգրան Կիրակոսյանը՝ սամբոյից, Արթուր Թովմասյանը դարձել է մարմնամարզությունից Համաշխարհային ուսանողական խաղերի չեմպիոն: