Ֆիլմերս միայն իմը չեն. Ասպետ Շերմազանյանի «Նորամուտ»-ը

ԵՐԵՎԱՆ, 22 ՀՈԿՏԵՄԲԵՐԻ, ԱՐՄԵՆՊՐԵՍ: Երիտասարդ ռեժիսոր Ասպետ Շերմազանյանը կինոն ֆենոմենալ երևույթ է համարում: Կարճամետրաժ ֆիլմերի սիրահար ռեժիսորը փաստում է` լավ կինո նկարահանելու համար քիչ միջոցներն էլ բավարար են. պարզապես պետք է գիտակցել, թե ինչն ինչպես է անհրաժեշտ օգտագործել:

«Արմենպրես»-ը ներկայացնում է Ասպետ Շերմազանյանի «Նորամուտ»-ը:

Ասպետ Շերմազանյանը` կինոյում հայտնվելու մասին

Արմատներով լոռեցի եմ, ծնվել եմ Երևանում 1993 թվականին: Մինչև ռեժիսուրան ընտրելը զբաղվել եմ տարբեր բաներով` և’ սպորտով, և’ նկարչությամբ: Բայց փոքր հասակից ինձ համար ֆենոմենալ երևույթ է եղել կինոն, շատ եմ սիրել այն, երևի ընտանիքի ազդեցությունն էր. անընդհատ շփվել եմ կինոգործիչների հետ: Բացի այդ, շատ եմ սիրում պատմություններ պատմել. ինչ-որ չափով դա էլ ռեժիսուրայի հետ կապ ունի:

Դպրոցն ավարտելուց հետո ընդունվել եմ Երևանի թատրոնի և կինոյի պետական ինստիտուտի կինոգիտական բաժին`Անիտա Երզնկյանի կուրս: Երկու տարի անց գնացի Մոսկվա և ընդունվեցի Կինեմատոգրաֆիայի համառուսաստանյան պետական ինստիտուտ (ВГИК): Սովորում եմ Ալեքսանդր և Վլադիմիր Կոտտերի մոտ. գիտեի, որ երիտասարդ վարպետներ են, գործի մարդիկ, ընդունվեցի և միանգամից անցել ենք գործնական աշխատանքի. սկսել ենք նկարահանել շատ ֆիլմեր:

Կարճամետրաժ ֆիլմերի սիրահարը

…Ինձ համար կարևոր է, որ ֆիլմում ինտրիգ լինի, Հիչկոկի ասած «suspence» (սպասում, լարվածություն), որպեսզի դիտողներին լարված ու ասեղների վրա պահի: Իմ կարճամետրաժները տարբեր ժանրերի են: 2012 թվականին ստեղծեցի առաջին ֆիլմս, որը կոչվում է «8.Մի գողացիր»: Հիմքում աստվածաշնչյան 8-րդ պատվիրանն է. շատ թեթև հումորի միջոցով բացատրում եմ, թե ինչու չի կարելի գողանալ: Արժանացել է շատերի համակրանքին, տարբեր փառատոնների ենք մասնակցել այդ ֆիլմով:

2012-ին մեկ այլ ֆիլմ նկարահանեցի, կոչվում էր «Kill man» («Սպանել մարդուն»): Այս մեկի հիմքում Ջեք Լոնդոնի համանուն պատմվածքն է:

Սփիլբերգի մոտ նկարահանված դերասանը` հայ ռեժիսորի ֆիլմում

2013-ին նկարահանեցի «Նվերը» վերնագրով ֆիլմ, որի հիմքում Օ Հենրիի ստեղծագործությունն էր: Ողբերգական պատմությունը համեմել եմ նուրբ հումորով: Այնուհետև Վամպիլիովի «20 րոպե հրեշտակի հետ» պատմության մոտիվներով նկարահանեցի «Ինչ է եղել գիշերը» կարճամետրաժը: Նոյեմբերին, հուսով եմ, մոսկովյան «Խուդոժեստվեննի» կինոթատրոնում տեղի կունենա այս ֆիլմի պրեմիերան: Պատիվ եմ ունեցել այս նախագծի շրջանակում համագործակցել Միխայիլ Գորևոյի հետ, ով Հոլիվուդում ռուս ամենահայտնի դերակատարներից է: Վերջերս նա Սթիվեն Սփիլբերգի «Bridge of Spies» («Լրտեսական կամուրջ») ֆիլմում ռուս լրտեսի է մարմնավորել: Պատիվ եմ ունեցել նաև աշխատել դերասան Վիկտոր Սուխորուկովի հետ:

Վերադարձի թեման` «Աղ ու հաց» ֆիլմում

«Աղ ու հաց»-ն իմ վերջին ֆիլմն է, և առաջին աշխատանքը, որը նկարահանել եմ Հայաստանում: Այն մեծ պատասխանատվության զգացումով նկարել եմ Լոռվա աշխարհում, որն ինձ համար շատ թանկ է և սիրելի: Կինոնկարի նախաձեռնողը եղել է «Look Film»-ը, որը հովանավորում է երիտասարդ կինոգործիչներին, բացահայտում տարբեր անուններ:

«Look Film»-ն այն ուղարկելու է աշխարհի 20 լավագույն կինոփառատոններ` այդ թվում Կանն, Բեռլին, Վենետիկ, Տորոնտո, այն նաև կցուցադրվի Երևանում, մարզերում, սփյուռքում...

Ֆիլմի հիմքում «Անառակ որդու վերադարձը» առակն է. ի տարբերություն բիբլիական հերոսի, ով բարոյապես ոչնչացված է վերադառնում, իմը կայացած ու տղամարդ դարձած է հետ գալիս: Իմ հերոսը հասկացել է, որ առանց հող ու ջրի, հայրական օջախի, աղ ու հացի ինքը ոչինչ է: Ֆիլմում քննարկվում է վերադարձի թեման. վերադարձ դեպի արմատները, հայրենի հողը:

Սկզբում պրոդյուսերները չէին համաձայնում, որ գամ Հայաստան նկարահանելու, բայց համառեցի, ի վերջո եկա այստեղ և ճիշտ արեցի:

…Ես ապրում եմ Ռուսաստանում, շատ ընկերներ ունեմ արտասահմանում, և մեզ բոլորիս համախմբում է Հայաստանը, լեռները, հայի արժեհամակարգը: Մենք վերադառնալու ենք, որովհետև ուրիշ տարբերակ չունենք, մեզ մի բան է փրկելու` մեր դիմագիծը չմոռանալը ու մեր ես-ը պահպանելը:

Մասնակցություն փառատոններին

Իմ ֆիլմերով մասնակցել եմ փառատոնների Չեխիայում, Համբուրգում, Թիֆլիսում, Տալլինում, Սերբիայում, Ավստրալիայում, Խորվաթիայում և այլ երկրներում:

Ռոբերտ Ռոդրիգեզն Ասպետի ամենասիրած ռեժիսորներից է

Կինոյի համար լավ թիմ, մթնոլորտ, սցենար ու պրոֆեսիոնալ տեխնիկա է պետք, և կարևոր է, թե ինչպես ես այս ամենն օգտագործում: Ռոբերտ Ռոդրիգեզն իմ ամենասիրած ռեժիսորներից է: Նա դասախոսություններ ունի, որտեղ սովորեցնում է, թե ինչպես փոքր բյուջեով լավ ֆիլմեր կարելի է անել: Կինոինստիտուտում ինձ հաճախ նրա հետ են համեմատում: Ասում են` քիչ ես գումար ծախսում, բայց ճոխ է ստացվում, ինչո՞ւ է այդպես:

…Ես համր կինոյի սիրահար եմ, իմ երեք ֆիլմերն առանց խոսքի են: Կինոն թիմային աշխատանք է. մենք, հայերս, չենք սիրում թիմային աշխատանք, դրա համար ֆուտբոլում այնքան էլ հաջողությունների չենք հասնում:

Ուզում ենք հաղթել, և միայն մեր մասին խոսեն: Իմ ֆիլմերը միայն իմը չեն, նրանք իմ ընկերներինն են:

Կատակերգություն` Միխայիլ Գալուստյանի մասնակցությամբ

Շուտով նաև պլանավորում եմ քրեական կատակերգություն նկարահանել Միխայիլ Գալուստյանի,Ալեքսանդր Գորդոնի և Ալեքսանդր Լյապինի մասնակցությամբ: Հիմա հովանավորների եմ փնտրում` նախագիծը իրականացնելու համար:

Միևնույն ժամանակ հիմնական մեծ նպատակ ու երազանք ունեմ վերադառնալ Հայաստան, քանի որ իմ հողի վրա ապրելն ու աշխատելը շատ եմ կարևորում: Ես, լինելով երկրիս արժանի ու լիիրավ քաղաքացի, հպարտ և ուրախ կլինեմ նպաստել իմ պետության կինեմատոգրաֆի զարգացմանը:

«Արմենպրես» լրատվական գործակալությունը հանրության դատին է հանձնում նոր՝ «Նորամուտ»խորագրով շարքը: Շարքի նպատակն է հանրությանը ներկայացնել մեր տաղանդավոր և ստեղծագործող երիտասարդ դերասաններին, ռեժիսորներին, բեմադրիչներին, նկարիչներին, երաժիշտներին և այլն, պատմել, թե ինչով են նրանք ապրում, ինչ հետաքրքրություններ ունեն, ինչ խնդիրների են բախվում ստեղծագործելիս և աշխարհը փոխելու ինչ ծրագրեր ունեն:

Ռոզա Գրիգորյան