2 րոպեի ընթերցում
ԵՐԵՎԱՆ, 14 ՀՈԿՏԵՄԲԵՐԻ, ԱՐՄԵՆՊՐԵՍ: Շվեյցարական Swatch Group-ը, որը կապիտալացման ցուցանիշով ժամացույցների խոշորագույն արտադրողն Է աշխարհում, Չինաստանում ներկայացրել Է նոր Էլեկտրոնային ժամացույցները, որոնց օգնությամբ կարելի Է վճարել գնումների դիմաց, տեղեկացնում Է «Արմենպրես»-ը՝ հղում անելով Bloomberg գործակալությանը:
Swatch Bellamy ժամացույցները, ի տարբերություն Apple-ի եւ մյուս արտադրողների «խելացի ժամացույցների», սմարթֆոններին չեն միացվում եւ չեն կարող մտնել Համացանց, սակայն դրանք հանդերձված են անլար կապի համար նախատեսված միկրոչիպով, որը նման Է բանկային քարտերի չիպերին:
Ժամացույցի արժեքը, որը ՉԺՀ-ում վաճառքի կհանվի հաջորդ տարվա հունվարին, կկազմի 580 յուան (91 դոլար): Սպասվում Է, որ մյուս շուկաներում ժամացույցները կհայտնվեն ավելի ուշ:
Վճարային համակարգը գործարկելու համար Swatch-ը գործընկերություն Է կազմակերպել China UnionPay-ի հետ, որը երկրի խոշորագույն պրոցեսինգային ընկերությունն Է, եւ Bank of Communication պետական բանկի հետ:
Ինչու Է շվեյցարական ընկերությունը նորույթը ներկայացնում Չինաստանում, այլ ոչ թե Շվեյցարիայում հարցին, ընկերության ներկայացուցիչ Նիկ Հայեկը նշել Է, որ, «ծանոթ լինելով շվեյցարական բանկերի աշխատանքին, նոր տեխնոլոգիայի ներդրումն այնտեղ կարող Է ամիսներ կամ նույնիսկ տարիներ տեւել»:
Չինաստանում շարժական սարքերի օգնությամբ վճարումների ծավալը 2014 թվականին կտրուկ մեծացել Է 134 տոկոսով եւ հասել 3,6 տրիլիոն դոլարի: Մինչդեռ դյուրակիր սարքերի համաշխարհային շուկայի ծավալը, ըստ HIS հետազոտական ընկերության գնահատման, մինչեւ 2019 թվականը կկազմի 32,2 մլրդ դոլար, հաղորդել Է «Ինտերֆաքս»-ը: