ՀԾԿՀ-ն կքննարկի «Օրանժ Արմենիա»-ի բաժնեմասը «Յուքոմ»-ին օտարելուն համաձայնություն տալու հարցը

ԵՐԵՎԱՆ, 18 ՕԳՈՍՏՈՍԻ, ԱՐՄԵՆՊՐԵՍ: Հայաստանի Հանրապետության Հանրային ծառայությունները կարգավորող հանձնաժողովը կքննարկի «Օրանժ Արմենիա» փակ բաժնետիրական ընկերության բաժնեմասը օտարելուն համաձայնություն տալու մասին հարցը: Ինչպես «Արմենպրես»-ը տեղեկացավ Հայաստանի Հանրապետության Հանրային ծառայությունները կարգավորող հանձնաժողովից, նիստը տեղի կունենա օգոստոսի 20-ին:

«Հիմք ընդունելով «Էլեկտրոնային հաղորդակցության մասին» Հայաստանի Հանրապետության օրենքի 14-րդ հոդվածը և հաշվի առնելով Հայաստանի Հանրապետության տրանսպորտի և կապի նախարարության 2015 թվականի օգոստոսի 14-ի №01/11/9743-15 ու «ՕՐԱՆԺ ԱՐՄԵՆԻԱ» փակ բաժնետիրական ընկերության 2015 թվականի օգոստոսի 11-ի N374-15ԱՄ գրությունները` Հայաստանի Հանրապետության Հանրային ծառայությունները կարգավորող հանձնաժողովը որոշում է. համաձայնություն տալ «ՕՐԱՆԺ ԱՐՄԵՆԻԱ» փակ բաժնետիրական ընկերության 100 տոկոս բաժնետեր «Օրանժ Պաղտիսիպասիոն» բաժնետիրական ընկերությանը պատկանող բաժնետոմսերն ամբողջությամբ «ՅՈՒՔՈՄ» սահմանափակ պատասխանատվությամբ ընկերությանը օտարելուն», - ասված է ՀԾԿՀ-ի որոշման նախագծի մեջ: