2 րոպեի ընթերցում
ԵՐԵՎԱՆ, 24 ՀՈՒԼԻՍԻ, ԱՐՄԵՆՊՐԵՍ: Իրանի տրանսպորտի նախարարությունը բազմաթիվ բանակցությունների է վարել Իրան-Հայաստան երկաթգծի կառուցման շուրջ, սակայն առայսօր լուրջ ներդրողներ չեն գտնվել: Լրագրողների հետ հուլիսի 24-ին կայացած հանդիպմանն այս մասին հայտնեց ՀՀ-ում Իրանի Իսլամական Հանրապետության դեսպան Մուհամադ Ռեիսին: «Իրանը Հայաստանը դիտարկում է որպես Պարսից ծովը Սև ծովին կապելու լավ միջանցք: Այդ երկաթգծի կառուցման համար անհրաժեշտ է մոտ 3 միլիարդ 200 միլիոն դոլար, ինչն իր հերթին ակնկալում է լուրջ ներդրող, որը դեռևս չի գտնվել»,-«Արմենպրես»-ի հաղորդմամբ` նշեց նա:
Նա նկատեց, որ Իրանի նկատմամբ տարիների ընթացքում կիրառվող պատժամիջոցների վերացումից հետո, Իրան-Հայաստան հարաբերություներն ավելի կզարգանան: «Իրանի արտաքին քաղաքականության գլխավոր առաջնահերթությունը հարևանների հետ հարաբերությունների զարգացումն է: Առաջիկա մեկ ամսվա ընթացքում Հայաստան է ժամանելու Իրանի փոխնախագահը` ի պատասխան ՀՀ վարչապետ Հովիկ Աբրահամյանի այցին: Այցի ընթացքում տեղի են ունենալու բանակցություններ` Հայաստան-Իրան էներգետիկ նախագծերի շուրջ, ինչպես նաև Հայաստանի և Իրանի միջև արդեն ստորագրված նախագծերի իրագործման շուրջ (Մեղրի ՀԷԿ, Հյուսիս-հարավ ճանապարհ)»,-շեշտեց Մուհամադ Ռեիսին: