2 րոպեի ընթերցում
ԵՐԵՎԱՆ, 22 ՀՈՒԼԻՍԻ, ԱՐՄԵՆՊՐԵՍ: Կյանքից հեռացել է լիբանանահայ մտավորական, Մեծի Տան Կիլիկիո կաթողիկոսության հայագիտական բաժնի տնօրեն, բանաստեղծ, թարգմանիչ Սարգիս Կիրակոսյանը: Ինչպես«Արմենպրես»-ը տեղեկացավ լիբանանյան «Ազդակ» օրաթերթից, մեծ մտավորականը վախճանվել է հուլիսի 21-ին` կեսգիշերին:
Ժամանակակից հայ բանաստեղծության կարկառուն դեմքերից Սարգիս Կիրակոսյանը եղել է «Բագին» գրականության ու արվեստի հանդեսի փոխխմբագիրը: Նա իր յուրահատուկ վաստակն է ունեցել արաբական գրականությունը հայերեն թարգմանելու մեջ: Կուսակցական պաշտոններ է վարել ՀՅԴ «Ն. Աղբալյան» և «Հ. Մարուխյան» կոմիտեներում:Վերջին ժամանակներում նա Մեծի Տանն Կիլիկիո կաթողիկոսության կրթության և հայագիտական բաժանմունքի վարիչն է եղել:
Ուսուցչական երկար տարիների վաստակի տեր Սարգիս Կիրակոսյանը հայ գրականության առարկան դասավանդել է Համազգայինի Մ. և Հ. Արսլանյան ճեմարանում և Մեծի Տանն Կիլիկիո կաթողիկոսության դպրեվանքում: Նաև եղել է Համազգայինի շրջանային վարչության անդամ:2015թ. մայիսի 28-ին Հայաստանի Հանրապետության նախագահ Սերժ Սարգսյանի հրամանագրով պարգևատրվել է «Մովսես Խորենացի» շքանշանով: Պարգևատրման արարողությունը կատարվել է հունիսի 9-ին Լիբանանում Հայաստանի դեսպանատանը:Նա եղել է լիբանանահայ գրողների համախմբման համահիմնադիր, նաև Հայաստանի գրողների միության անդամ էր:
«Արմենպրես»-ի խմբագրակազմը ցավակցում է Սարգիս Կիրակոսյանի մերձավորներին ու հարազատներին, կիսում մեծ մտավորականի ու անձնվեր հայի կորստի վիշտը:
Լուսանկարը` Կարեն Անտաշյանի