3 րոպեի ընթերցում
ԵՐԵՎԱՆ, 16 ՄԱՅԻՍԻ, ԱՐՄԵՆՊՐԵՍ: «Ճանապարհային անվտանգության ազգային խորհուրդ» հասարակական կազմակերպությունը Հայաստանում մեկնարկող ճանապարհային անվտանգության շաբաթվա շրջանակներում կրթական ծրագրեր կիրականացնի թիրախային դպրոցներում: Այս մասին «Արմենպրես» լրատվական գործակալության մամուլի սրահում անցկացված աշխատանքային քննարկման ընթացքում հայտնեց «Ճանապարհային անվտանգության ազգային խորհուրդ» ՀԿ-ի կրթական հարցերով ծրագրերի պատասխանատու Տաթևիկ Հովհաննիսյանը: «Դուք տեղյակ եք, որ ՄԱԿ-ում արդեն ավանդույթ է դարձել ճանապարհային անվտանգության շաբաթ ծրագիրը, որում ներառված է նաև Հայաստանը: Մենք Հայաստանում ճանապարհային անվտանգության մեկնարկող շաբաթը սկսում ենք լրագրողների հետ հանդիպումով, քանի որ շատ ենք կարևորում լրագրողների դերը ճանապարհային անվտանգության ապահովման հարցում: Մենք շաբաթվա ընթացքում ճանապարհային ոստիկանության հետ համագործակցության եղանակով ճանապարհային անվտանգության վերաբերյալ կրթական ծրագրեր կանցկացնենք թիրախային դպրոցներում, որոնք գտնվում են ճանապարհների վրա»,- «Արմենպրես»-ի հաղորդմամբ՝ ընդգծեց նա:
Տաթևիկ Հովհաննիսյանը հայտնեց, որ ծրագրին կմասնակցի նաև Հայաստանի Կին վարորդների ֆեդերացիայի նախագահ Մագա Մարտիրոսյանը, ով Հայաստանի կին վարորդների հետ քննարկումներ կկազմակերպի ճանապարհային անվտանգության թեմայով:
Մագա Մարտիրոսյանը նշեց, որ ֆեդերացիան տարիներ շարունակ համագործակցում է «Ճանապարհային անվտանգության ազգային խորհուրդ» հասարակական կազմակերպության հետ: «Հայաստանի Կին վարորդների ֆեդերացիան ստեղծվել է ոչ միայն կին վարորդների իրավունքները և օրինական շահերը պաշտպանելու համար: Մենք ունենք մի շարք ծրագրեր: Առաջին հերթին անցկացնում ենք վարորդական դասընթացներ՝ հակավթարային ուսուցում, և առաջիկա մեր միջոցառումը կլինի հունիսին, որը Հայաստանի կին վարորդների ձևավոր վարման առաջնությունն է: Դա կլինի, երևի, հունիսի 21-ին»,- նշեց նա:
Հայաստանի Կին վարորդների ֆեդերացիայի նախագահը նաև հայտնեց, որ իրենք հաջորդ շաբաթվա ընթացքում նախատեսում են հրավիրել կին վարորդների և կլոր սեղանի շուրջ քննարկում կազմակերպել: «Մենք կլսենք նրանց հուզող հարցերը և խնդիրները և արդեն համապատասխան բնագավառներում կհամագործակցենք գործող կազմակերպությունների հետ: Այնպես որ, աշխատանքներ բավականաչափ տարվել են: Ես «Մագավտո» հաղորդման շրջանակներում էլ մշտապես բարձրաձայնում եմ կին վարորդների խնդիրների մասին: Քանի որ արդեն մեկնարկում է անվտանգ երթևեկության շաբաթը, մենք հաջորդ շաբաթվա ընթացքում ունենք մի շարք ծրագրեր, որոնք կիրականացնենք»,- եզրափակեց Մագա Մարտիրոսյանը: