Հալեպում տեղի է ունեցել ցեղասպանության նահատակների հուշակոթողի բացման արարողություն և «Հողի կանչը» հանդիսություն
2 րոպեի ընթերցում
ԵՐԵՎԱՆ, 13 ՄԱՅԻՍԻ, ԱՐՄԵՆՊՐԵՍ: Հալեպում հայ երեք համայնքապետերի գլխավորությամբ տեղի է ունեցել հուշակոթողի բացման արարողություն և «Հողի կանչը» վերնագրով հանդիսություն՝ ի հիշատակ Հայոց ցեղասպանության նահատակների:
Այս մասին «Արմենպրես»-ը տեղեկացավ Հայոց ցեղասպանության 100-րդ տարելիցի Սիրիայի կենտրոնական մարմնի պաշտոնական կայքից: Հուշակոթողի բացումը տեղի է ունեցել Հ.Բ.Ը.Մ. Գ. Գյուլբենկյան կենտրոնի շրջակայքում, որին ներկա են եղել Հայ Կաթողիկե համայնքի առաջնորդ Տ. Պետրոս Արք. Միրիաթյանը, Հալեպում Հայաստանի գլխավոր հյուպատոս Տիգրան Գևորգյանը, հալեպահայ միությունների և կազմակերպությունների ներկայացուցիչներ:
Կաթողիկե համայնքի առաջնորդն օրհնել է հուշակոթողը, որի վրա փորագրված է «Հիշում եմ ու պահանջում»: Ապա մեկնարկել է «Հողի կանչ» հանդիսությունը: Ներկաները հոտնկայս հարգել են նահատակների հիշատակը:
Միջոցառման ընթացքում երգի, պարի, երաժշտության գեղեցիկ կատարարումներ են հնչել՝ ներկայացնելով հայ ժողովրդի կյանքը նախքան ջարդերը, ջարդերի ժամանակ, ինչպես նաև ներկան ու ապագան:
Հայոց ցեղասպանության 100-րդ տարելիցի Սիրիայի կենտրոնական մարմնի հովանավորությամբ և Հ.Բ.Ը.Մ. Մատենագիտական հանձնախմբի կազմակերպմամբ տեղի է ունեցել դասախոսություն «Մյուս թուրքը կարմիր գծից այն կողմ» թեմայով: