2 րոպեի ընթերցում
ԵՐԵՎԱՆ, 11 ՄԱՅԻՍԻ, ԱՐՄԵՆՊՐԵՍ: Սիրիահայն ու հատկապես հալեպահայը, անվտանգության բազմաթիվ դժվարությունների կողքին տնտեսական լուրջ խնդիրների է դիմագրավում: «Արմենպրես»-ի հաղորդմամբ` Հալեպի «Գանձասար» թերթն ահազանգ է հնչեցնում, որ Հալեպի բնակիչը գործազրկության ու սղաճի պատճառով դժվարությամբ է ապահովում իր օրական ապրուստը: «Հալեպից դուրս գալ ցանկացողները սիրիական լիրայի համեմատական անկման հետևանքով մեծ գումարներ են ծախսում նախ Լիբանան մուտք գործելու, ապա Հայաստան մեկնելու օդանավի տոմս ձեռք բերելու համար: Լիբանանում բնակվելը նույնպես մեծ ծախսեր է պահանջում, իսկ հարազատների մոտ ապաստան գտնելը ժամանակավոր հանգրվան է, որովհետև լիբանանցու համար ևս ապրուստն ապահովելը դժվար է: Հայաստանում հանգրվանող սիրիահայը բնակարան, աշխատանք ձեռք բերելու և ընդունելի կենսամակարդակով ապրելու մտահոգություն է ապրում, հատկապես, երբ բազմանդամ ընտանիք ունի: Այսպիսի դժվարությունների ծանր լծի ու անորոշության մեջ տագնապով ապրում է սիրիահայն ու հատկապես հալեպահայը»,-գրում է «Գանձասարը»:
Հայաշատ Հալեպը 2012թ. ամռանից հայտնվել է կառավարական ուժերի և զինված տասնյակ խմբավորումների բախումների թիրախում, և մինչ այսօր դրանք այնտեղ չեն դադարում: Քաղաքը բաժանվել է երկու մասի՝ արևելյան հատվածները գտնվում են զինված տասնյակ խմբավորումների, իսկ արևմտյան թաղամասերը սիրիական կառավարական ուժերի հսկողության տակ:
ՄԱԿ-ի տվյալներով` Սիրիայում մոտ 4 տարի շարունակվող բախումների հետևանքով զոհերի թիվը անցել է 220 հազարից: Զոհված հայերի թիվը գերազանցել է 100-ը: