ՀՀ կոռուպցիայի դեմ պայքարի խորհրդի կազմում ընդգրկվելու համար ՀԿ-ները կարող են դիմել ապրիլի 29-ից մայիսի 13-ը
2 րոպեի ընթերցում
ԵՐԵՎԱՆ, 28 ԱՊՐԻԼԻ, ԱՐՄԵՆՊՐԵՍ: Հայաստանի Հանրապետության կոռուպցիայի դեմ պայքարի խորհրդի կազմում ընդգրկվելու նպատակով հասարակական կազմակերպությունների հայտերը կարող են ներկայացվել ՀՀ, քաղաք Երևան, 0010, Հանրապետության հրապարակ, Կառավարական տուն, 1 հասցեով կամ ուղարկվել ՀՀ կառավարության աշխատակազմի աշխատակցի էլեկտրոնային հասցեին՝ marine.tovmasyan@gov.am: Ինչպես «Արմենպրես»-ին տեղեկացրին ՀՀ արդարադատության նախարարության տեղեկատվության եւ հասարակայնության հետ կապերի վարչությունից, հայտ կարող են ներկայացնել այն հասարակական կազմակերպությունները, որոնք, համաձայն ՀՀ կառավարության 2015 թվականի փետրվարի 19-ի N 165-Ն որոշմամբ սահմանված կարգի, ունեն հակակոռուպցիոն ոլորտի առնվազն վերջին հինգ տարվա գործունեության փորձ, որոնց կանոնադրության մեջ կոռուպցիայի դեմ պայքարը նշված է որպես գործունեության ուղղություն, ունեն հակակոռուպցիոն ոլորտի առնվազն վերջին հինգ տարվա համագործակցության փորձ միջազգային կազմակերպությունների հետ, կներկայացնեն միջազգային կառույցների հետ և (կամ) սեփական նախաձեռնությամբ նշված ոլորտին վերաբերող իրականացրած առնվազն 5 ծրագրի վերաբերյալ տեղեկատվություն, կներկայացնեն միջազգային կառույցների հետ իրականացված ծրագրերի արդյունավետության վերաբերյալ գործընկեր կազմակերպության կողմից տրված երաշխավորագիր:
Հասարակական կազմակերպությունները հայտին կից պետք է ներկայացնեն այն փաստաթղթերը (բնօրինակ և պատճեն), որոնք փաստում են վերը նշված չափանիշներին հասարակական կազմակերպության համապատասխանությունը:
Հայտերն ընդունվում են ընթացիկ տարվա ապրիլի 29-ից մինչև մայիսի 13-ը ներառյալ՝ աշխատանքային ժամերին: