2 րոպեի ընթերցում
ԵՐԵՎԱՆ, 21 ԱՊՐԻԼԻ, ԱՐՄԵՆՊՐԵՍ: Միացյալ Նահանգների Նյու Յորք նահանգի նահանգապետ Էնդրյու Քուոմոն ապրիլի 21-ին հայտարարություն է ստորագրել, որով 2015 թվականի ապրիլի 24-ը նահանգում հռչակվել է Հայոց ցեղասպանության զոհերի հիշատակի օր: «Արմենպրես»-ի փոխանցմամբ` այս մասին տեղեկացնում է Հայ դատի ԱՄՆ հանձնախումբը:
Նման քայլով Նյու Յորք նահանգը հարգանքի տուրք է մատուցել Հայոց ցեղասպանության զոհերի հիշատակին: «Այս տարի լրանում է ողբերգական իրադարձությունների 100-րդ տարելիցը, որի ժամանակ 1915 թվականի ապրիլի 24-ին հարյուրավոր հայ հոգևոր առաջնորդներ, մտավորականներ և ականավոր անձիք բերման ենթարկվեցին և բանտարկվեցին Կոստանդնուպոլսում` նշանավորելով Օսմանյան կայսրությունում 1.5 մլն հայերի սպանությունների, բանտակրությունների և աքսորի ութամյա ժամանակաշրջանի սկիզբը»,- ասվում է հայտարարության մեջ:
Հայոց ցեղասպանությունը ճանաչել են այնպիսի կազմակերպություններ, ինչպիսիք են Եվրոպայի խորհուրդը, Եվրախորհրդարանը, ՄԱԿ-ի մի քանի հանձնաժողովներ, Եկեղեցիների համաշխարհային խորհուրդը եւ այլն: Հայոց ցեղասպանությունը ճանաչել են շատ պետություններ. առաջինը պաշտոնապես ընդունել է Ուրուգվայը 1965 թ-ին: Նրան հետեւել են Ֆրանսիան, Իտալիան, Բելգիան, Նիդեռլանդները, Շվեյցարիան, Շվեդիան, Ռուսաստանը, Լեհաստանը, Լիտվան, Հունաստանը, Սլովակիան, Կիպրոսը, Լիբանանը, Արգենտինան (2 օրենք, 5 բանաձեւ), Վենեսուելան, Չիլին, Կանադան, Վատիկանը: Ինչպես նաև Միացյալ Նահանգների մոտ 42 նահանգ, այդ թվում` Նյու Յորք նահանգը:
Լուսանկարը` wikipedia