«Բացահայտենք Երևանը» բազմալեզու էլեկտրոնային գիրքը շուտով հասանելի կլինի տարբեր կրիչների վրա

ԵՐԵՎԱՆ, 1 ԱՊՐԻԼԻ, ԱՐՄԵՆՊՐԵՍ: «Բացահայտենք Երևանը» նոր էլեկտրոնային գիրքը շուտով հնարավորություն կտա Երևանի այցելուներին և զբոսաշրջիկներին մանրամասն ծանոթանալ մայրաքաղաքի և դրան հարող շրջակա տարածքների հետ: Այս մասին ապրիլի 1-ին էլեկտրոնային գրքի շնորհանդեսի ժամանակ տեղեկացրեց Հայկական վիրտուալ համալսարանի (ՀՎՀ) հիմնադիր և համանախագահ Երվանդ Զորյանը:

Անվճար ներբեռնման հնարավորությամբ Էլեկտրոնային գիրքը կիրառելի է ինչպես համակարգիչների, այնպես էլ հեռախոսների և պլանշետների վրա: Այն հասանելի կլինի յոթ լեզուներով՝ անգլերեն, ֆրանսերեն, ռուսերեն, իսպաներեն, արևելահայերեն և արևմտահայերեն, ինչպես նաև թուրքերեն:

«Գիրքը առաջարկում է Երևանով զբոսանքի վեց երթուղիներ` ներկայացնելով մայրաքաղաքի ուրարտական, պարսկական և ռուսական շրջանների պատմությունը, ինչպես նաև այցելություն կառաջարկի երևանամերձ զբոսաշրջային և պատմամշակութային արժեք ունեցող վայրեր», - նշեց Երվանդ Զորյանը:

Մեկօրյա փոքրիկ շրջայցներից մինչև մշակութային տոնակատարություններ և սոցիալական միջոցառումներ ներկայացնող էլեկտրոնային ուղեցույցն խոստանում է տրամադրել ծրագրերի բազմազանություն և դրանցից օգտվելու դյուրին ճանապարհներ:

ՀԲԸՄ Հայկական վիրտուալ համալսարանի (ՀՎՀ) եւ Երեւանի քաղաքապետարանի ջանքերով հրատարակված «Բացահայտենք Երեւանը» էլեկտրոնային գրքի շնորհանդեսը տեղի ունեցավ Հայկական բարեգործական ընդհանուր միության (ՀԲԸՄ) 88-րդ Ընդհանուր ժողովի շրջանակում: