2 րոպեի ընթերցում
ԵՐԵՎԱՆ, 28 ՓԵՏՐՎԱՐԻ, ԱՐՄԵՆՊՐԵՍ: Հալեպի Սուլեյմանիա շրջանի գլխավոր հրապարակը, որը երկու տարուց ավելի անցարգելներով և քարերով փակված էր մեքենաների երթևեկության համար, փետրվարի 27-ի հետմիջօրեին վերաբացվել է: Այս մասին «Արմենպրես»-ը տեղեկացավ «Բերիո Լուրեր» ֆեյսբուքյան էջից: Հրապարակի բացումը բնակիչների շրջանում ուրախության առիթ է հանդիսացել:
Աղբյուրը նաև տեղեկացրել է, որ Հալեպում ջրամատակարարումը բարելավվել է. ջուրն օրվա ընթացքում միայն մի քանի ժամով է անջատվում: Էլեկտրականության ընդհատումները երկարատև են. 24 ժամվա ընթացքում միայն միանում է 1,5 ժամով: Վառելանյութի խնդիրը մասամբ լուծվել է: Մթերքներ քաղաքում թեպետ առկա են, սակայն թանկ գներով: Այս պայմաններում տարբեր միությունների կողմից մշակութային ձեռնարկները աշխուժորեն շարունակվում են:
Ավելի վաղ՝ փետրվարի 26-ին, Հալեպում զինված ահաբեկչական խմբավորումների կողմից հրասանդներ ընկնելու հետևանքով մեկ հայ էր զոհվել, ևս 3-ը վիրավորվել էին: Զոհվել էր 1964թ.-ին ծնված Հակոբ Գաբրիելյանը և վիրավորվել էին Շողեր Արսլանյանն, Սոսի Ստամբուլյան-Օհանյանը և Ժան Մահեայանը:
Հալեպ քաղաքը 2012թ. ամռանից ի վեր հայտնվել է կառավարական ուժերի և զինված խմբավորումների, այդ թվում «Ջաբհա ան Նուսրա» և այլ իսլամիստական, ինչպես նաև Արևմուտքից աջակցություն ստացող ընդդիմադիր խմբավորումների բախումների թիրախում: