ՀՀ ոստիկանությունը հերքում է Գյումրիի ռուսական ռազմաբազայից զինծառայողի փախուստի մասին խոսակցությունները (լրացված)
2 րոպեի ընթերցում
ԵՐԵՎԱՆ, 27 ՀՈՒՆՎԱՐԻ, ԱՐՄԵՆՊՐԵՍ: Հայաստանի Հանրապետության ոստիկանությունը հերքում է Գյումրիի 102-րդ ռուսական ռազմաբազայից զինծառայողի փախուստի մասին խոսակցությունները: Ինչպես «Արմենպրես»-ին տեղեկացրին ՀՀ ոստիկանությունից, տեղեկատվությունն իրականությանը չի համապատասխանում: «Ռուսական ռազմաբազայից զինծառայողի փախուստի մասին լուրն իրականությանը չի համապատասխանում»,- փոխանցեցին ՀՀ ոստիկանության լրատվական ծառայությունից:
Գյումրիում խոսակցություններ էին տարածվել, որ ռուսական ռազմաբազայից կրկին զինծառայող է փախել, ինչը քաղաքում խուճապային տրամադրություններ է առաջացրել:
Գյումրիում տեղակայված ռուսական 102-րդ ռազմաբազայից Գյումրու քաղաքապետարանին ևս վստահեցրել են, որ նոր զինծառայողի փախուստի մասին ասեկոսեները չեն համապատասխանում իրականությանը: Այս մասին «Արմենպրես»-ին տեղեկացրեց քաղաքապետի մամուլի պատասխանատու Լիլիթ Մակարյանը: «Գյումրու քաղաքապետ Սամվել Բալասանյանը հեռախոսազրույց է ունեցել ռուսական 102-րդ ռազմաբազայի հրամանատարության, ինչպես նաև Գյումրիում ՌԴ հյուպատոսի հետ՝ կապված Գյումրիում տարածված խոսակցությունների հետ, թե ռուսական ռազմաբազայից կրկին զինծառայողէ փախել: Վերջիններս հերքել են տարածված լուրի հավաստիությունը` նշելով, որ այն չի համապատասխանում իրականությանը և ապատեղեկատվություն է»,- նշեց Լիլիթ Մակարյանը: